Koyê Gabarî yê Şirnexî de yo ke dewleta tirke tede talanê xoza domnena, şewatê daristanî vejîya. Nuqtaya Qilê Zîyaretî  ya Koyê Gabarî de, yo ke  hetê walîtîye ra sey ''herêma asayîşê taybetî'' ameyo îlankerdene, şewat vila beno.

Rixmo ke warê şewatî de rayîr est o vera şewatî qet mudaxale nînokerdene. Leşkerê tirkan û qoricîyê ke semedê cigêrayîşê petrolî herême de yê xebere dîyaye înan la bi bahaneyê ''erazîya mayînine''  mudaxaleyê şewatî nêkenê.

Dîya zanaye ke herêma dewa Dara ya Kahane û tîtikê Koyê Gabarî serranê 90yan ra nata dekewtişê sîvîlan rê qedexe ya.

Herêma ke tede şewat vejîya têna tede xebetkarê şîrketî yê ke semedê cigêrayîşê petrolî herême de yê, qoricî û leşkerî est ê.