Seba wedaritişê tecrîdê Rayberê Şarê Kurdî Abdullah Ocalanî, zaf welatan de grevê vêşnanîye bi tewrê çalakwananê newîyan dewam keno. Kurdistanijê bi nameyê Îmam Şîş o ke Gallerî de grevê vêşanîye de yo, rixmê problemê weşîye sey bêhalîye, dejê sereyî, kêmbîyayîşê şekerî  moralê ci berz o. Şîş Merkezê Cimatê Demokratîkî yê Kurdî yê bajarê Newportî yê Gallerî de  serdayîşanê Kurdistanijan qebul keno. Şîş waxto ke serdayîşê Kurdistanijan û dostanê înan kêm bo kitab waneno û bîyayîşanê rojdemî nêzdî ra taqîp keno. Reyna ge-ge tewrê weşananê sazgehanê çapemenîye beno û qalê amancê çalakîya xo keno.

Serdayîşê ke danê şanî dest pêkenê heta nêmeyê şewe dewam kenê. Gallerî ra û zaf bajaranê cîyan yê Îngilîstanî ra merdimî serdayîşê Şîşî kenê. Şîş zî merdimê ke yenê serdayîşê ey ci rê qalê fikiranê xo yê derheqê prosesî keno û bewlî keno ke, înan heme bedelî girewtê çimanê xo ver û mutleq do ser bikewê.

Şîşî, persêka azadîya şarê Kurdan esta vat û bewlî kerd ke,“Persêka giran a teduştîye esta, Cografyaya Kurdistanî ameya dagirkerdene, Efrînî de bi hezar kes ca û canganê xo ra kerd, bi hezar kes ameyî qetilkerdene. Hêrişê serê şarê Rojava dewam keno. Rewşêka winaye de xeter û hêrîş hende gird o û  tecrîdkerdişê Rayber Apoyî dewam keno, nêbeno ke merdim seke her çî asayî yo cuya xo dewam bikero. Gelo ma na bianorîye senî qebul kenîme? Ney, ma do na bêanorîye qebul nêkenîme. Waştişê ma cimatkî yo, waştişê ma waştişê biheq ê, waştişê bi mîlyonan ê. No semed ra îdîaya ma gird a, xoverrodayîşê ma gird o û ma do ser bikewê.“