Hemsereka Konseya Rayberdişî ya KCKyî Besê Hozat tewra 'Bernameyê Taybetî' yê Medya Haberî bîye û Qirkerdişê Parisî yê 23yê Kanûne ercna.

Qiseykerdişê Besê Hozat ra tay noqtayê girîngî wina yê:

''Qirkerdişê Parisî yê 9ê Çeleyê 2013î û 23yê Kanûne de cinîyê serkêşî û kadroyê partîye û şexsê înan de têgêrayîşê azadîye yê kurdan ameyî hedefkerdene. Eşkera yo beşêkê îstîxbaratê Fransa mîyanê nê karî de yo. Dewleta Fransa ra zî tay kesî mîyanê nê karî de yê. Xora MÎT û dewleta tirke bi sereyê xo nêeşkenê nê qirkerdişan bikerê. Kamî ke nê qirkerdişî kerdî ganî hesab bido. Dewleta tirke û rejîmê AKP-MHPyî û MÎT ganî hesab bidê. Dewleta tirke kesanê ke sûcanê krîmînalan ra bi serran tepişte manena xo rê kena tetîkkeş. Ma qetilkerdişê Sakîne Cansiz û Nagîhane Akarsel de zî no çî dî. 

No tetîkkêşê Qirkerdişê Parisî yê 23yê Kanûne zî zîndanî ra yeno vetene û dima hetê dewleta tirke ra yeno şuxilnayene. Qirkerdişê 9ê Çeleyê 2013î de zî eşkera bibi ke tetîkkêş Omer Guney hetê dewleta tirke ra erşawîyayo. La Fransa çîyêk nêkerd. Ganî hînî Fransa nê qirkerdişan roşnî bikera. Ganî Fransa nê qirkerdişî roşnî bikera û dewleta tirke û Erdoganî muhakeme bikera. Qirkerdişê 23yê Kanûne de kurdan roja verêne de vat ke qirkerdiş hetê dewleta tirke ra ameyo kerdene. 

Fransa de hende multecîyî, merdimî est ê la nê tetîkkêşî zî cinîyêka kurde ya serkêşe qetil kerde. No hedef normal nîyo. Embaze Evîne Goyî Endama Konseya Rayberdişî ya KCKyî bîye. Aye xeylêk kede dabî têgêrayîşî, bedelê pîlî dabî û vera DAÎŞî şer kerdbî. Merkezê Parisî de hîrê kurdî hetê dewleta tirke ra ameyî qetilkerdene. Fransa neçare ya ke hesabê ney bidda. Şarê ma zî do hesabê nê qirkerdişan tim biperso. 

Dewleta tirke bi serran hemkarîya DAÎŞî kerde. Eşkera bibi ke qirkerdişê ke DAÎŞî Ewropa de kerdbî, bi hetkarîya dewleta tirke bîyî. Dewleta tirke û DAÎŞ mutefîq ê. Nê vera  kurdan pîya hêrişan kenê, qirkerdişan kenê. No hêrişê 23yê kanûne heman wext de vera şaranê Fransa ameyo kerdene. 

Şarê ma roja verêne ra nata bi xurtî vera nê qirkerdişî tewirê xo mojna û vejîya waran. Ez nê tewirê şarê ma fîraz kena. Qirkerdişê Parisî yeno nîqaşkerdene, nêrazîbîyayîşê cidîyî vejîyayî were. Ma dî ke eke xoverdayîşo xurt bêro kerdene ma do qetî netîce bigêrê. Ma do dewleta tirke ra wina hesab bipersê. Fransa do neçare bimana ke dewleta tirke muhakeme bikera û raştîyan eşkera bikera. 

Qirkerdişê 23yê Kanûne dewamê Qirkerdişê 9ê Çeleyê 2013î yo. Dewleta tirke hêrişê xo yê vera kurdan kiriştî teberê welatî Ewropa. Dewleta tirke her ca de kurdan kena hedef û serkêşanê kurdan qetil kena. Dewleta tirke kena kena ke bi Ewropa nînan bida qebulkerdene.

Ma kewtê çeleyî. Ez şexsê embaze Sara, Fîdane Dogan û Leyla Şaylemez de pêro şehîdanê şorişî û azadîye bi rêzdarî û minetî yad kena. Ma do hesreta înan qetî do bîyara ca û têkoşînî ser bivisnê.''