Hemserekê Komeleya Heqanê Merdiman (ÎHD) Ozturk Turkdoganî ANFyî rê tecrîdê Îmraliyî û cezayê kefyî yê Îmraliyî ercnayî.

Turkdoganî vist vîrî ke Komîteya Vergirewtişê Îşkenceyî (CPT) yê Konseya EWropa zîyaretê gulane yê 2019î ra dima Tirkîya rê pêşnîyazî kerdî û Tirkîya herinda ke nê pêşnîyazan bîyara ca, pê rayîrê cezakerdişê keyfî Abdullah Ocalanî rê pêvînayîşî qedexe kerdî.

Ozturk Turkdoganî vat: ''Eke şima tim ceza bidê yew kesî o beno sebebê mexdurîyetê heqî.Eke şima pêvînayîşanê ci asteng bikerê, cezayê keyfî yê sey 'woltaeştişî' bidê ci no yeno manaya mexdûrîyetî. Xora avûkatanê Ocalanî zî na ceza Mehkemeya Heqanê Merdiman a Ewropa ra eşnawita. Bi rayîrê tecrîdî verê Abdullah Ocalanî yeno girewtene ke îtîraz bikero.Yanî heqê ci yê îtîrazî binpay beno. Ocalan tebaxa 2019 ra nata çew nêdîyo, xora naye ra pîlêr çîyêk çin o. O nêeşkenê heqanê xo yê xozayîyan bişuxilno.''

Ozturk Turkdoganî pare kerd ke ÎHD zî tede 4 dezgehan muracatê Komîteya Wezîran a Konseya Ewropa kerd û waşt ke wa bira MHME ya vera cezaya muebede bimojna. Turkdoganî vera cewabê Tirkîya nêrazîbîyayîşê xo  mojna.

Ozturk Turkdoganî  vat: ''Cewabê hukmatî yê komîte raşt nîyo. Îmrali de tecrîd û cezakerdişo keyfî dewam kenê û pêşnîyazanê CPTyî nênê caardene. Ma sey 4 dezgehan heqê hêvîye vist komîte vîrî. La Tirkîya qetî qala na babete nêkerde. Qanûnê Tirkîya Îmrali de nênê caardene. No nêno qebulkerdene. Ganî her kes vera tecrîd û kerdişanê keyfîyan wurzo payan ser.''