Festîvala Huner û Kulturî ya Cinîyan ya ke Êlih de bi şîarê "Cinîya azad hunero azad” hetê Organîzasyono Hunerkî, KESK, DÎSKî ra ameye organîzekerdene roja diyîne de dewam kerde. Festîval de Zarok MA Petrolket de domanan reyde ame têhet. Aktîvîe bi vatişê deyîra “Zimanê Kurdî” qedîya.

Bi wesîleya festîvale banê Petrol-Îş yê Êlihî de bi sernameyê 'Tecrîd û asîmîlasyon' panel ame kerdene. Panelo ke moderatorîya ci aktîvîsta TJA Rûkene Zeryam Işik Yildiz kerd, Wekîla HEDEPî ya Şirnexî Newroze Uysal Aslan û Îdarekara Heyetê Pêroyî yê Destarî Jine Aryen sey qiseykerdoxî tewrê ci bîyî.

Newroze Uysale bale ante tecrîdê giranî yê serê Rayberê Şarê Kurdî Abdullah Ocalanî ser û vat, "Qanûnê mîyanneteweyî her warî de yenê binpaykerdene. Qanûnanê xo zî nêanê caardene. Îmrali de heqê tepişteyan eşkera yenê binpaykerdene. Birêz Ocalan roja tepiştişî ra binê tecrîdê giranî de yo. Tecrîdo ke bi komployî dest pêkerd, hema dewam keno.  Bi tecrîdî wazenê komelî dîzan bikerê. Birêz Ocalan Rayberê şarê kurdî yo. Wazenê Rojhelatê Mîyanênî newera dîzayn bikerê. Nê dîzayn de herinda kurdê azadî de kurdê koleyî wazenî. Sîstemo ke nê wazeno, tecrîdî dano domnayene. Ocalan vera tecrîdî xover dano û ameyoxê kurdan sero fikîryeno. Zîndan de 20 kitabî vetî. Dewlete kena ke Birêz Ocalanî şarî rê bido vîrakerdene. Her warî de nê ceribneno. Bi şerê taybetî wazenî komelî ra raqilnê. La ê se kenê wa bikerî nêeşkenê şarî û Ocalanî cêser bifînê. Ma tewr peynî kampanyaya azadîye ya ke her hetê dinya de ameye destpêkerdene de zî dîye ke fîrkê Birêz Ocalanî senî vila bîyî û senî şarî wayîrê ey vejîyenê. Derheqê tecrîdî de ganî her kes hîsgêr bo. Heta ke tecrîd mero wedaritene, problemê şarê kurdî nêqedîyenê."

Jine Aryen zî bale ante polîtîkayanê asîmîlasyonî ser û vat, “Ganî ma vera polîtîkayanê asîmîlasyonî xover bidê. Êlih de vera nê polîtîkayan tewiro xurt est o. Bi nê tewirî ziwan û kultur yeno averberdene. Ganî ma zafêr wayîrê ziwan û kulturê xo bivejîyê. Festîvale ke bi destê dewlete yenê kerdene xora semedê asîmîlasyonî yê. Semedê xapînayîşê şarî deyîranê kurdkîyan cinenê."