Hemserekê Pêroyî yê Partîya Sosyalîste ya Bindestan (ESP) Şahîn Tumukluyî derheqê rojdemî de ANFyî rê qisey kerd.

Tumukluyî bale ante dewaya vera HDPyî ser û vat: ''Dewawaya qefilnayîşê HDPyî huqûqî nê eşkera hêrişkarîye ya. Pê polîtîkaya hêrişkare wazenê verê mucadeleyê  demokratîkî bigêrê ke wa kedkar û bindestî meeşkê heqê xo bipawê. Bi qefilnayîşê HDPyî wazenê faşîzmî bikerê mende û cehd kenê ke sere de kurdî verê têkoşînê şorişgêrî yê sosyalîst, demokratîkan ê ke mutefîkê kurdanê, bigêrê. Tîya wezîfeyo esas ê HDP û dînamîkanê ke semedê demokrasîyî mucadele kenê yo.''

Tumukluyî  derheqê fezlekeyanê vera CHPyî de zî nê wina vat: ''Bi vatişê şarî rejîmo faşîst dest berz keno. CHPyo ke sey burjuva yeno namekerdene ey rê zî destê xo derg keno. CHP de xora tim hersê kedkar û bindestan yeno sipitene, vervejîyayîş yeno hewnakerdene û dînamîkê mucadeleyî ancîyenê xeta muhalîfe.Wexto ke wekîlîya Omer Faruk Gergerlîogluyî dîyaye war CHPyî ra veng nêvejîya la vera înan zî ewro bi tewirêkê dişmenkî fezlekeyî yenê amadekerdene. Krîzê rejîmê faşîstî bîya xorî coka hêrişê her kesî û her çîyî keno.''

Şahîn Tumukluyî  vat: ''Pê planê çokdayîşî yeno waştene ke têkoşînê şaran bêro şiknayene. Bi hêrişan wazenê ke mucadeleyo rêxistinkerde yê kedkar û bindestan tesfîye bikerê. Hetê bînî ra dînamîkê mucadeleyî zî xeylêk wexto rol û berpirsîyarîya xo nêanê ca. No sere de problemê têgêrayîşê şorişgêrî yê Tirkîya  û sosyalîstan o. Coka na nuqta de ma rexnekerdişê xo zî danê.''

Tumukluyî pê nê vatişan dewam kerd: ''Eslê xo de wextêko derg o semedê averşîyayîşê dînamîkê mucadeleyî çîqî perenê. Grevê vêşanîye yê Leyla Guvene, mucadeleyê Mayanê Haştîye yê kuçeyan, semedê Pêkerdişê Îstanbulî û Bogaziçi, Kurdîstan de vera qeyûman û sîyasetê nîjadperestî no ame dîyene. Meydananê Newrozî de semedê pawitişê HDPyî vengo berz vejîya.''

Tumukluyî muhîmîya mucadeleyê hemparî vist vîrî û vat: ''Ma sey Hêzanê Mucadeleyê Yewîyayeyî wezîfeyê ma yo taybet esto. Ganî hetê tewr qerardarî  bêrê têhet. Eke ma wazenê xorexnekerdişê xo yê polîtîk û pratîk ê nê prosesî bidê ganî ma xoverdayîşê vera tecrîdî,  qeyûmê Bogaziçî, betalkerdişê Pêkerdişê Îstanbulî û qefilnayîşê HDPyî bikero yew.''

Hemserekê Pêroyî yê ESPyî Şahîn Tumukluyî  qiseykeridşê xo wina qedîna: ''Eke ma nê mucadeleyan bikero yew sere de tecrîdê serê birêz Ocalanî, binpaykerdişê heqanê zîndanan, peyser ancîyayîşê Pêkerdişê Îstanbulî heme eynî nuqta ra vejîyenê. No mucadele bi tewirê tewr qerardarî ganî kuçeyan de fîîlî  û meşrû bêro rayraberdene. Bi na wesîle ez xoverdayoxê ke grevê vêşanîye de înan selam kena û hurmetê xo înan rê şawena.''