Serekê Pêroyî yê Partîya Têgêrayîşê Kedkarî (EHP) Hakan Ozturkî bi wesîleya serrgêra 25ine ya Komployê Mîyanneteweyîyî ANFyî rê qisey kerd.

Ozturkî îfade kerd ke sosyalîstanê Tirkîya qala prosesê Komployê Mîyanneteweyîyî û prosesê peyê ney şarê Tirkîya rê bi raştî û bi qîmî nêkerda û vat: ''Sosyalîstê Tirkîya xeylêk meseleyan ser o nîqaşan kenê, tewir mojnenê la wexto ke babete yena meseleya kurdan ser o bêveng manenê. Meseleyanê nê welatî ra yew zî meseleya kurdan a ke ganî ma qala ci bikerê. Eke persêke bêra mezgê sosyalîstan ganî biewnê Şorişê Teşrîna Verêne. Sosyalîstan o çax haştîye pawite û şerê Rûsya-Almanya qebul nêkerd. Sosyalîstan nêvat ke 'Almanya emperyalîst a, coka ganî ma vera ci şer bikerê.' Ganî ma zî sey sosyalîstanê ê çaxî haştîye bipawê.''

Ozturkî dîyar kerd ke ziwanê kurdkî estbîyayîşêko arkeolojîk nîyo gandar o û vat: ''Kurdkî hetê nufusêkê zêdeyî ra yena qiseykerdene. La çareserîya sey 'ma enstîtuyêkî awan bikerê, wa tîya de kurdkî bêra cigêrayene' nêbena. Ahmet Kayayî seba ke waştbi ke bi ziwanê xo kurdkî qisey bikero ame protestokerdene, welat terikna. Na mesele peynîya Osmanîyan ra nata est a.''