Torra Ziwan û Kulturê Kurdan û Platformê Ziwanê Kurdkî Change.org de seba ke kurdkî biba ziwanêko fermî 21ê sibate de kampanyayêke dabi destpêkerdene. Kampanya do heta 15ê Gulane Roşanê Ziwanê Kurdkî dewam bikera û dima îmzayê ke arê dîyayê do bierşawîyê dezgehan.

Çarçewa kampanya de Rêxsitina HDPyî ya Wanî de zî bi tewrbîyayîşê nuştox û rojnamegeran yew kombîyayîş amebi kerdene. Hetkarê Hemserekanê HDPyî Tayîp Temel zî tewrê kombîyayîşî bibi. Nuştoxî Qehîr Bateyî û Îbrahîm Sungur û Hemserekê HDPyî yê Wanî yê ke tewr kombîyayîşî bîyî derheqê babete qisey kerd.

Qehîr Bateyî ard ziwan têhetameyîşê HDPyî û nuştoxanê kurdan gamêka erey bî zî herême de reya verêne xebata wina muhîme yena kerdene û vat: ''Ganî kombîyayîşê wînayênî şaristananê bînan de zî bibê. Ganî sîyasetmedar û nuştoxê kurdan pîya semedê kurdkî sere bidejnê. Xora na têna meseleya nuştox û sîyasetmedaran nîya. Na meselaya hempare ya kurdan a. Kombîyayîş de pîya bi rexneyan xeylêk fikîrî vejîyayî werte. Semedê kampanya têna vengdayîş û medyaya sosyale nêvejana. Ganî yew bi yew berî bêrê cinayene.'

Îbrahîm Sungurî zî ard ziwan ke kombîyayîş de rexnêyê pêtî ameyî kedene û vat: ''Domanê ma hinî kurdkî qisey nêkenê. Têna qiseykerdiş zî nêvejeno. Ganî hewn û xîyalê ma kurdkî bê. Êyê ke têgêrayîşê azadîye yê kurdî de ca genê  ganî kurdkî qisey bikerê. Êyê ke kudkî qisey nêkenê bawerîya şarî înan rê kêm bena. Seba ke polîtîkaya asîmîlasyonî bêro şiktene ganî na xebeta bêro pîlkerdene.''

Fîkret Doganî zî ard ziwan ke înan kombîyayîş de derheqê kampanya de fîkîr girewtî ke kampanya bibo hîra û vila bo û vat ê sey partîye destê înan ra çi bêro do semedê kurdkî bikerê.