Parlamenterê Partîya Çepe ya Swêdî û Vervatoxê Polîtîkayanê Teberî Hakan Svennelingî  teşrîna peyêne û kanûne de vernîyazî pêşkêşê hukmatî kerdbi û teda û hêrişê Swêd û Tirkîya yê vera kurdan vistbi rojdemê parlamento.

Svenneligî waştbi ke Swêdî kişîyayîşê Olof Palmeyî ra kurdan ra zaf neheqîyî kerdî coka uzrê xo biwazo. Dima bi vernîyazêkê cîyayî Svenneligî Swêdî ra waşt ke vera tecrîdê Îmraliyî têbigêro.

Wezîrê Edaletî yê Swêdî Mikael Dambergî çend rojî verî cewab da vernîyazanê Svennelingî û pare kerd ke kurdê ke kişîyayîşê Palmeyî ra zerarî dîyî eşkenê muracatê Mufetîşîya Hukmatî û Ombdusmanê Edaletî bikerê û tazmînat bigêrê.

Svennelingî derheqê cewabê Wezîrî de qisey kerd û vat ke seba swêdî xemginî ya ke xo mesuldarê nê neheqîyan nêvîneno.

Svennelingî 10ê kanûne de zî Hukmatê Swêdî ra waşt ke seba ke endamê DAÎŞî yê ke hemwelatîyê Swêdî yê û destê QSDyî de yê hîna radîkal nêbê têbigêrê.

Svennelingî vat: ''Swêd ganî têkoşînê vera DAÎŞî de mesuldarîya xo bîyaro ca û paştî bido Îdareyê Xoserî yê Rojawanî. Ganî Swêd seba hukmkerdişê sûcdaran înan rê hetkarî bikero.''