Grevê vêşanîye yê bêdêm-bidorî yo ke vera tecrîdê serê Rayberê Şarê Kurdî Abdullah Ocalanî 27ê teşrîna peyêne de ame destpêkerdene roja 166 de dewam keno. Heyetê Teqîpkerdişê Grevê  Vaşanîye yo ke temsîlkaranê OHD, ÎHD, ÇHD, TÎHV, MA-TUHAYDER û SESî ra yeno ra derheqê rewşa zîndanan de eşkerayîye daye.

Heyeto ke mabênê tarîxanê 4-10 gulane de zîndanê Herêma Marmara zîyaret kerdî Şubeyê OHDyî yê Îstanbulî de raporê xo eşkera kerd.

Rapor de nê ameyî parekerdene: ''12 zîndanan de nizdê 612 kesan girev de yê.  Nê çalakwanan ra bi desan verî zî kewtî grevê vêşanîye. Tepişteyî seba ke kewtî grev derheqê înan de cezaya dîsîplînî ameye dayene û vîtamînê B1î nêdîyeno înan. Mektubê ke tepişteyan seba ke vengê xo bidê eşnawitene dezgehanê heqanê merdiman û partîyanê sîyasîyan rê nuştî ameyî destsernayene. Bi bahaneyê janê Korona xora şertê tepişteyanê ke zehmet bî, zehmetêr kerdî. Heme heqê tepişteyan yenê binpaykerdene û tepişteyî nînê tedawîkerdene. Eke grevê vêşanîye dewam bikero weşîya tepişteyan ser o do tesîro xirab bikero. Ma tîya ra veng danê Wezîrîya Edaletî û heme dezgeh û rayapêroyîye yê newtewe û mîyanneteweyî ke wa her kes hîsgêr têbigêro û semedê çareserî çîyêk bikero. Eke çîyêk nêro kerdene do netîceyê giranî vejîyê werte. Coka ganî cade tecrîdê Îmraliyî bêro qedînayene.''