Komeleya Hetkarîya Keyeyanê Tepişteyan (TUAY-DER) pare kerd ke Înan Akino ke Zîndanê Amedî ra sewqê Zîndanê Kurkçulerî yê Adana bi maruzê îşkenceyî bi.

TUAY-DERî derheqê mesele de nê çîyî dayî zanayene: ''Keyeyê Înan Akinî muracatê ma kerd. Avûkatê Akinî semedo ke nameyê ci sîstem de nêaseyêne saetêke ame vindartene. Wextê zîyaretî de avûkatî dî ke bedenê Akinî de rêçê îşkenceyî estê. Goreyê vatişanê Akinî 25ê tebaxe de wexto ke Akin şîyo Zîndanê Kurkçulerî 25-30 gardîyanan pabeyê ci bîyî û tira waşt ke xo zût bikero. Akinî no qebul nêkerd kincê ci ameyî dirnayene. Gardîyanan sloganê 'Rûmetê merdimîye do îşkence bin bikero' yê Akinî ser o bi sloganê 'biciwîyo îşkence' Akinî rê îşkence kerd. Gardîyanan Akinî rê gef wend û vat: '25ê tebaxe xo vîrî ra mekere, no hema destpêk o.' Dima zî Akinî rê cezaya keyfîye ameye dayene.  Tepişte Înan Akin zîndan de têna maneno, asayîşê ci çin o.''

Eşkerayîye de ame vatene ke Înan Akin gerreyê îşkenceyî  kerd.