Partîya Çepe ra dima Partîya Keskan zî babeta SÎHAyan ê tirkan berde rojdemê Meclîsî ke pê nê SÎHAyan sivîlî kişîyenê, sûcê şerî yenê kerdene. Partîya Keskan waşt ke teknolojîya almanana ke roketanê SÎHA de esta, bêra eşkerakerdene.
Dewleta tirke Rojawan û Başûrê Kurdîstanî de pê rayîrê Teyarayanê Bêmerdiman ê Biçekan (SÎHA) sivîlan kişena, qirkerdişan kena. Qirkerdişê dewleta tirke ra dima babeta SÎHAyan hetê partîyanê muxalefetî yê Almanya ra ameye berdene bi rojdemê Parlamentoya Almanya. Wekîlê Partîya Çepe Andrej Hunkoyî hewteyê vîyarteyî de derheqê SÎHAyanê tirkan de persêk persabi û Wezîrê Dewlete Nels Annenî ra waştbi cewab bido ci.
Partîya Keskan a Almanya zî çend rojî verê cû vernîyazêkê persî pêşkêşê Meclîsê Almanya kerd û persabi ke roketanê SÎHAyan de teknolojîya almanan esta yan çin a. Vernîyazê persî ra çend rîpelî resayî destê ANFyî û eşkera bi ke fuzeyê bi nameyê ''UMTAS'' û ''MAM-L'' hetê artêşa tirke ra yenê xebitnayene.
Partîya Keskan bi taybetî derheqê fuzeyanê UMTASî de tay çîyî persayî ke serra 2010î ra nata Almanya roşena artêşa tirke û pê rayîrê nê fuzeyan dewleta tirke qirkerdian kena.
Partîya Keskan persa ke fuzeyê MAM-Lî SÎHAyanê bi nameyê Bayraktar TB2î de estê yan ney.
