Wekîlê HDPyî yê Kocaelî Omer Faruk Gergerlîogluyî Meclîs de derheqê binpaykerdişanê heqan ê zîndanan de kombîyayîşê çapemenîye kerd.

Gergerlîogluyî verî Denîze Poyraz yad kerde. Gergerlîogluyî bale ante ser ke Zîndanê Sîlîvrî de awa germe nêdîyena, kalorîferî nêveşê, werd qîm o. Gergerlîogluyî ard ziwan ke Zîndanê Sîlîvrî de zaf tepişteyê nêweşî estê û ganî şertê ci bêrê weşkerdene.

Gergerlîogluyî wina qala binpaykerdişan kerde: ''Zîndanê Bakirkoyî de tepişte lînga Jîyane Erdînç de platîn esto, nêeşkena payan ser o vindera, tuwaletê alaturka bişuxilna û ranzaya yewkesî de rabikewa. Hema zî klozet nêdîya ci.

Embazê Vedat Erkmeno ke Zîndanê Tekîrdagî de bi hawayêkê şikdarî merdbi Yasîn Eneçî da zanayene ke heqê ci yenê binpaykerdene, kalorîferê ci nêvêşenê, tuwaletê ci girewte yo, warê hewayî yê hucreyê ci ameyo qefilnayene. Eneçî vat prosesê vera Erkmenî vera înan zî yeno caardene la ê nêfikirîyenê ke xo bikişê.Eneçî vat ke eke çew vajo ey xo kişto no zûr beno. Gardîyanan 17-18ê kanûne de pê copan Eneçî ro dayo, eşto odaya sungerîne, erey erşawîyayo nêweşxaneyî. Derheqê Eneçî de 4 tehqîqatî ameyê akerdene û gardîyanan tira vato 'Pîs terorîst, kesê sey to ganî nêciwîyê.' Eneç di rojan hucre de tepişîyayo, eşya nêdîyayo ci. Avûkatanê ci vat ke sereyê Eneçî masayo, nêeşkeno payan ser o şoro, serê ey de kincê goninî estê.''