Dima ke îqtîdarê AKP-MHPyî dest nabi wekilîya ci ser Omer Faruk Gergerlîoglu Merkezê Pêroyî yê HDPyî de 'Nobeta Edaletî' rê dewam keno. Roja 12. ya nobete de Gergerlîogluyî ANFyî rê qisey kerd. 

Gergerlîogluyî da zanayene ke betalkerdişê wekilîya ci birêka sîyasî bîye û vat: ''Mi muxalefetêko aktîf kerdêne. Înan pê fezleke, tehqîqat, dewa û sûcdarîyan kerd ke ma pasîf bikerê. Dewaya mi ameye lezkerdene û wekilîya mi ameye betalkerdene. Ez do nêzdî de dekewa zîndanî. Şarê Tirkîya zî vîneno ke na bire sîyasî ya. Ma na bire qebul nêkenê û vera nê xespî Merkezê Pêroyî yê HDPyî de nobeta xo rê dewam kenê. Ez apey gamêke nêrzena, Ez pê eşq û bawerîyêka pîle heqê şarî pawena. Ê mi bierzê zîndanî zî ez uca de nobeta xo rê dewam bikera. Weçinîtoxan no emanet da ma û ma ganî emanetê înan bipawê.''

Gergelîogluyî vist vîrî ke betalkerdişê wekilîya ci ra dima kongreya MHPyî ra verî vera HDPyî dewaya qefilnayîşî ameye akerdene û vat: Bi serran o ê vera ma hêrişanê winasênan kenê. La ê do qetî netîceyêke nêgêrê.  Nîyetê înan esto ke meseleya kurdan bi lezî bikerê binê erdî û weçînayîşê 2023î de vajê 'mesele çin a.' Coka ê wazenê pêro partîyanê kurdan biqefilnê. Erdogan û Bahçelî pê polîtîkayanê neo-Osmanî qesasê xo gênê. Derdê ma caardişê demokrasî yo.''

Gergerlîogluyî îfade kerd ke şar zî wayîrê têkoşînê HDPyî vejîyeno û vat: ''Goreyê teblîgatî pancşeme wextê mi qedîyeno. Ez do roja çarşemeyî kombîyayîşêkê hîrayî de mesajê xo yê peyênî bida û dima keyeyê xo de înan bipawa. Ez do xo ver nêda. Eke ez bikewa zîndanî zî 'Nobeta Edaletî' rê dewam bikera. Embazê mi do alaya mi dewr bigêrê. Wa komel her cayî ra 'nobeta edaletî' binuso û xoverdayîşêkê sivîlî bikero. Dewlete pêro merdiman ro morê 'terorîzmî' dano. Wa her kes çalakîya ma cayê xo de bikero. Ez komel û sîyasetmedaran rê ney pêşnîyaz kena.''