Partîya Demokratîke ya Şaran (HDP) seba ke muameleya wardayîşê wekîlîya Omer Faruk Gergerlîogluyî bêhuqûq bêro vindarnayene muracatê  Mehkemeya Qanûnê Bingeyî kerd.

Verê muracatî bi tewrbîyayîşê Wekîlê HDPyî yê Îstanbulî Erol Katircoglu û avûkan eşerayîye ameye dayene. Gergerlîogluyî ke tîya qisey ard ziwan ke bîlasebeb wekîlîya ey dîyaye wardayene û vat: ''Her kes na neheqîye zano la tay hetî hema zî bêveng ê. Yew bêhuqûqîye esta ke do siba şima rê zî bibo.  No cînayetê hukmî yo. Vera nayî bêveng memanê. Beno ke çîyo ke  ewro mi rê bîyo, siba, şima rê, bîr yewna kesî/e rê bibo.

Partîya mi xora pê paşta mi de ya la ez wekîlanê bînan û heme hetan  ra zî paştdayîşo zelal pawena. Reyê ma yenê binpaykerdene. Ez do bikewê zîndan. Yewo ke vajo ez merdim a ganî senî cigêrayîşê heqî caverdo? Seba ke mi binpaykerdişê heqan vetî werte mi rê nayî kenê? Mehkemeya ke derheqê Enis Berbergoluyî de qerarê edaletî girewt ez zî tira eynî qerarî pawena. Ez Mehkemeya Qanûnê Bingeyî ra qerarê edaletî pawena.''