16ê teşrîna peyêne d eşaristanê Kolnî yê Almanya de çarçewa safhaya diyîne ya Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de rayraşîyayîş û mîtîng do bêrê kerdene.

Çarçewa amadekarîyan de Hemserekanê KCDK-E, federasyonan, têgêrayîşanê cinîyan û ciwanan esnafî, keyeyî zîyaret kerdî, kombîyayîşî viraştî, konserî kerdî û vilawekî vila kerdî. 

Hemserekê KCDK-E Engîn Severî derheqê babete de ANFyî rê qisey kerd û vat: ''Ma bi şîarê 'Ma Rayberîye azad bikerê' nê çalakîyî rêxistin kerdî. Wexto ke 44 mengan ra dima Rayber Apoyî selamê xo şawit, ma de kelecanêko pîl virazîya. Ma Koln de cewabê nê selamî bidê. Ma pabeyê bi se hezaran kesan ê ke bi yew ziwanî û qiseyî, bi şîarê 'Rayber Apoyî rê Azadîye' waran debikerê. 

Ma ganî qalê Rayberîye 'tecrîd dewam keno' bîyarê xo vîrî, seba şiknayîşê tecrîdî û caardişê azadîya Rayber Apoyî têkoşînî biresnê her warî. Seba şiknayîşê tecrîdî û caardişê azadîya Rayber Apoyî ganî her kes Koln de bibo. Eke bi mîlyonan merdimî bêrê ma do tecrîdî bişiknê. Luksê ma çin o ke ma vajê 'nêweş ê, nêeşkayê.' Rayber Apo rûmetê şarê kurdî yo, azadîya ey azadîya ma ya. 

Şert û mercî senî benê wa bibê zî wa her kes 16ê teşrîna peyêne de verê xo bido Kolnî Ganî her kes bi ruhê seferberî Ddeutzer Werftî yê Kolnî de bibê.  Ma bi nê ferasetî her kesî dawetê Kolnî kenê.''