Namzeda Şaredarîya Gimgimî ya DEM Partî Gulbahare Koca derheqê xebatan û armancanê înan de ANFyî rê qisey kerd.

Gulbahare Koca 1978 de dewa Segranî ya qezaya Gimgimî ya Mûşî de dadîya xo ra bîya. Aye beşê Huneranê Rindan ê Zanîngehê Balikesîrî qedîna û wextêk mamostatîya resimî kerde. Aye 2012 ra dima îdarekarîya BDPyî kerde. Heta ke Şaredarîya Gimgimî rê qeyûm ame tayînkerdene Gulbahare Koca Merkezê Kulturî ya Mordemî de xebatî kerdî. Gulbahare Koca 2017 de tepişîyaye û çar serran zîndan de menda. A nika mîyanê TJA de xebatanê xo rê dewam kena.

Gulbahare Koca pare kerd ke qeyûman pêro çimeyê Gimgimî werdê la qeza rê xizmetêk zî nêkerdo. Gulbahare vat: ''Qeyûman çopî zî arê nêdayêne. Pêro projeyê ma ameyî vindarnayene. Gimgim de erazîyê şaredarîye zaf ê la seba domanan warê kaykerdişî zî çin o. Ke ma bêrê şaredarîye ser ma do texrîbatanê qeyûman nêzdî ra bivînê. Qeyûman Gimgim de awilî destkewteyê cinîyan kerdî hedef û Merkezê Cinîyan ê Savuşka qefilna. Vengê cinîyan zî qeyûmî nerehet kerdî.

Gimgim de şar zafê elewî yo la misilmanî zî est ê. Ancî tîya de kurmanc û zazayî pîya ciwîyenê. Partîya ma pêro nasnameyan rê bi heman hawayî nêzdî bena. La qeyûmî zî sey dewlete elewîyan rê cîyakerîye kenê. Qeyûmî nêwazenê ke elewîyî îdare de cabigêrê.''

Gulbahare Koca vist vîrî ke qeyûmî ra verî înan seba ke gazo  xozayî bêro Gimgimî zaf xîret kerdbi la qeyûmî xebatê gazê xozayîy vindarnayê. Gulbahare vat: ''Şarê ma neçarîye ra komirî şuxilnenno la komir hem xoza rê hem zî weşîya merdiman rê zerar dano. Gimgim de awe zaf a la çirikan ra awa pasine yena. Ancî qeza de meseleya binawanîye zî est a. Ma destpêk de armanc kenê ke meseleya gazê xozayîy û awe çareser bikerê.

Gimgim de têkoşînê cinîyan xurt o. Ney de tesîrê partîya ma zaf o. Ma do wextê îdareyê xo de ancî seba cinîyan waran awan bikerê. Ma do seba ciwanan xebatanê kultur û hunerî bikerê.  Ma do dezgehanê xo newe ra abikerê. Gimgim de heywankarîye çimeyê debare yo girîng o. Ma do kooperatîfê berhemanê şitî awan bikera.''

Gulbahare Koca da zanayene ke şarê Gimgimî hinî wazeno qeyûman ra xo bixelisno û vat: ''Çend serrî yo xizmetê tewr asanî zî şarê ma rê nêameyî kerdene. Gimgim wayîrê pirrkulturan o. Ma do nê cîyatîyan îdareyê xo de temsîl bikerê. Ma do xebatanê xo bi ziwanê dayîke bikerê. Şar destpêkî ra nata bi coşî paştî dano ma û tewrê xebatanê weçînayîşan beno. Ma zî sey şarê xo hêvîdar ê. Ma do şarê xo reyde şaredarîya xo bi xurtî bikerê û cuya ke şarê ma heq keno awan bikerê.''