Hemsereka KCDK-E Fatoşe Goksungur derheqê Qirkerdişê Parisî de ANFyî rê qisey kerd.

Hemsereka KCDK-E Fatoşe Goksungur bale ante Qirkerdişê Parisî yê 9ê Çeleyê 2013î ser û vat: ''10 serran ra dima Paris de qirkerdişo diyîn ame kerdene. Plankaranê Qirkerdişê 9ê Çeleyî Qirkerdişê 23yê Kanûne zî plan kerd. Hêriş vera têgêrayîşê cinîyan, vera xoverdayîşê bi serkêşîya cinîyan ame kerdene. Fermanê nê qirkerdişî hetê Anqara dîya.

Eşkerayîya vizêrîne ya Suleyman Soyluyî balkêş bîye. Vat 'Serekkomar Erdoganî ma wezîfedar kerdî ke her cayê dinya de terorîstan çin bikerê.' No îtîraf o. Coka ganî Fransa nê qirkerdişî roşnî bikera. Dewleta Fransa Qirkerdişê 9ê Çeleyî ra mesuldar a. No qirkerdişo diyîn şerma Fransa ya bîn a. Ganî cinîyê ke serkêşîya Komunê Parisî kenê xo vîr a mekerê. ''

Goksungure îfade kerd ke Merkezê Kulturê Kurdan ê Ahmet Kayayî heta ke cenazayî bêrê girewtene her roje 24 saetan do akerde bimano. Goksungure da zanayene ke roja dişemeyî saete 12.00 de Merkezê Kulturê Kurdan ê Ahmet Kayayî ra heta Buroyê Enformasyonî yê Kurdîstanî ke 9ê çeleyê 2013î de Sakîne Cansiz, Fîdane Dogan û Leyla Şayleme tede ameybî qetilkerdene rayraşîyayîşêk do bêro kerdene. Roja sêşemeyî zî Merkezê Kulturê Kurdan ê Ahmet Kayayî ra heta bi Wezîrîya Edaletî rayraşîyayîşêk do bêro kerdene.