Xeylêk bajaranê Kurdîstan û Tirkîya ra keyeyê tepişteyan seba ke bale biancê serê rewşa tepişteyanê sîyasîyan ser tewrê kombîyayîşê grûba HDPyî bîyî. Dayîkanê ke bi laçikanê xo yê sipîyan tewrê kombîyayîşî bîyî. Kombîyayîş de slogana ''Biciwîyo xoverdayîşê zîndanan'' bîye berz.

Hemsereka Pêroyî ya HDPyî Pervîne Buldan bi wesîleya serrgêra şehadetê ci sîyasetmedaro kurd Murat Bozlakî yad kerd û vat: ''Rîyê polîtîkayanê îqtîdarî ra 2021î de her hetî ra rijnayîşî têdima ameyî. Sere de meselaya kurdî heme problemê Tirkîya herinda çareserkerdişî de dahîna ameyî xorîkerdene.''

Buldana ard ziwan  keyeyê tepişteyan tewrê grûba înan  bîyî û vat: ''Tepişteyê sîyasîyî reyna rojdem de yê. Bitaybetî tepişteyê nêweşî mergî rê ameyî veradayene. Rixmê raporanê nêeşkenê zîndan de bimanê yenê tepiştene. Menga kanûne de 6 tepişteyan dinaya xo bedilnaye. Nêweşî weş dekewenê zîndanan û bi tabûtan vejîyenê. Înfazê tepişteyan yenê vêşnayene. Nê pêro pabesteyê polîtîkayanê tecrîdî yê Îmraliyî yê. Zîndan de eslê xo de wîjdan ameyo mehkumkerdene. No îqtîdar do miheqeq bêro bedinayene. Keyeyê ma têna nîyê. Ma sey HDPyî kişta şima de yê. Vengê şima vengê ma yo. Ma tîya rena vengê Wezîrîya Edaletî danê; goş bidê vengê keyeyanê tepişteyan. Caardişanê teberê merdimîye yê zîndanan vindarnê. Tugluk û tepişteyanê nêweşan veradê. Ganî rayapêroyîya demokratîke û muxalefeto komelkî wayrîê sîyasetê cuye vejîyê.''

Buldane vera sîyasetê hêrişkare yê îqtîdarî bale ante xoverdayîşî ser û vat: ''îqtîdarê AKP-MHPyî zulmo ke nêkerd nêmend la şarê Tirkîya waştişê xo yê haştîye ra peyser game nêeşte. Têkoşînê Keyeyê Şenyaşaran, Çorlu, Soma, Roboskî, Mayanê Şemeyî, Mayê Haştîye û her hetê komelî ame domnayene.  No têkoşîn do dewam bikero û tewr peynî de ser bikewo. Zîhnîyeto tersûnêk ke vano qey pê hêrîşan verê ma bîgêro hêzê ma zaf rind vîneno. Rixmê heme hêrişan nêeşka îradeyê şaran bişkino. Îqtîdar par ser nêkewt  û do emser zî meşeko ser bikewo.

Şima zanê 28ê kanûne de hêrişê banê ma yê Bahçelîevlerî kerd ke qirkerdişêko bîn sey Îzmîrî bikerê. Yew linga nê hêrişan qesre ra pê destê hukmî yeno îdarekerdene. Sey dewaya Kobanê nê hêrişî zî plankerde yê yewbînan rê girêdaye yê. Hêrişkarê ke bi çeke û kardî hêrişê banê partîya ma kerde vizêr ame veradayene. Hukmê AKPyî ke tim vera wekîlanê ma seba ke fekê xo akerdo dosyayan akeno û destnêpadayîşê ci wedarano kiştoxan paweno. Hêrişkar veradayo ke vanê şi hêrişê vera HDPyî rê dewam bikerê. Êyê ke vanê qey pê hêrişan partîye û şarê ma tersnenê xelitîyenê. Ê do ser nêkewê. Seba ke ma kiştoxê Denîze Poyraz rê vat kiştox ma yenê muhakemekerdene. Seba ke malayanê DÎAYDERî hutbeyo kurdkî wendo yenê hepskerdene û muhakemekerdene. Hukma qesre vera kurdkî dişmenîye keno. Ma zî tîya ra qalêka kurdkî ya bîne vanê 'Qedîya' wextê şima qedîya.''

Bi nameyê keyeyanê tepişteyan Hakki Boltanî qisey kerd. Boltanî vat: ''Ma domananê xo yê nêweşan wazenê. Ma nêwezanê domanê ma mergî rê bêrê caverdayene. Ma tîya yê ma wazenê wa qerarê edaletî û mehkemeyan bêrê caardene. Zîndanan de hetê tay komîsyonan ra binê nameyê komîteyanê çimdarî de qerarê mehkeme yenê betalkerdene û cezayê neweyî dîyenê ci. Ma naye qebul nêkenê. Eke vera domananê na neheqîye nêro kerdene ma pê bawer ê ke do meseleyê welatî bêrê çareserkerdene.Sebebê heme krîzan na bêedaletîye ya. Sey dadî û babîyan vengê ma nîno goşterîkerdene. Partîyî û dezgehê komelê sîvîlî muhatabê ma yê. Seba ke vengê ma dano eşnawitene wa HDP weş û war bo.''