Wekîla DEM Partî Guldrene Varli ard ziwan ke ê do vera polîtîkayanê ke vera erjanê şarî yenê rayraberdene têkoşînî xurtêr bikerê û vat rixmê heme zext, tepiştiş û şîdetî ciwanî do warê polîtîkî ra dûrî mekewê.
Wekîla DEM Partî Guldrene Varli derheqê fuhuş û narkotikî yo ke Wan û Colemêrg de çarçewaya polîtîkayanê şerê taybetî de bi destê dewlete yeno vilakerde qisey kerd.
Gulderene Varli ard ziwan ke şarê kurdî bi serran o vera polîtîkayanê çînkerdiş, înkar û asîmîlasyonî têkoşînê xurtî yê estbîyayîşî rayra beno û nê vatî: ''Vengê nê têkoşînî tim zima. No zimayîş resa warê mîyanneteweyî ame vînayene ke şarê kurdî têkoşînê heqdarî rayra beno. Serranê 90yan de semedê şiknayîşê têkoşînê kurdan dewî ameyî vêşnayene û vengkerdene. Nika vera ziwan, kultur, gonvende û erjanê kurdan hêrişî yenê kerdene.
Îqtîdar keno ke bi polîtîkayanê hêrişkaran ê vera kurdan payra bimano. Kurdê ke mecbûr mendê dewanê xo ra vejîyayî wazenê agêrê dewanê xo la bi waranê asayîşê taybetî û qedexeyan verê ci yeno girewtene. Ciwanî bajaranê rojawanî de ziwan, kultur û herra xo ra dûrî de raştê asîmîlasyonî yenê. Polîtîkayê şerê taybetî tewr zaf Wan û Colemêrg de yenê caardene. Bi sîstemê koricîtîye û şîdetê camêrd-dewlete yeno waştene ke komel erjanê xo ra bêro raqilnayene.
Dewlete wazenê bi metodanê cîya cîyayan têkoşînê şarê kurdî bişikno. Bitaybetî bajaranê sey Wan, Amed, Colemêrg, Mêrdîn, Elîh, Şirnex de û xeylêk bajranê bînan de hetê koricî, çawîşê pîspor, leşker û polîsan ra bi polîtîkayanê şerê taybetî cinî, ciwan û domanî yenê hedefgitewtene. Bedenê cinîye ser o hêrişî yenê kerdene û seba ke ciwanî bibê ajan raştê zextî yenê. Bi nê hêrişan kenê ke waranê têkoşînî yê kurdan çîn bikerê. Polîs û çawişê pîsporê ke kiştox û tecawuzkar ê nînê cezakerdene. Zîhnîyetê ke aqibetê Gulîstane Doku safî nêkerd hema zî kiştoxê Narîne nêdîyo.
Kurdîstan de xeylêk bajaran de şuxulnayîşê narkotîkî kewto binê des serran. Wekîlî meclîs de rêxistinê komelê sîvîlî herême de hîşyar kenê, cend kenê ke verê ci bîgîrê la selahîyetdarî tedbîran nêgênê. Herinda vergirewtişê çeteyan de rojnamegera ke xebere viraşte yena hedefgirewtene. Çete, hêrişkar û tecawuzkarî nînê cezakerdene û no zî verê fuhuş û narkotîkî akeno. Rixmê heme zextan û hêrişan ê do meeşkê ciwanan warê polîtîkî ra bifînê dûrî.''
