Sereka Şubeyê Îstanbulî ya Komeleya Heqanê Merdiman (ÎHD) Gulserene Yolerî derheqê meseleya tepişteyanê nêweşan û karanê ÎHDyî de ANFyî rê qisey kerd. 

Gulserene îfade kerd ke tepişteyan de nêweşîyanê bedenî reyde nêweşîyê psîkolojîkî zî zaf virazîyenê û sebebê ney zî tecrîd o. Gulserene vat: ''Tecrîd û îzolekerdişê tepişteyan tesîrê giranî kenê. Tepişteyî keyeyanê xo ra dûrî de zîndanan de yenê cakerdene. Tay tepişteyî est ê ke 8-10 serrî nêeşkenê keyeyê xo bivînê. Teynatîye ra meseleyê psîkolojîkî û travmayî virazîyenê.''

Gulserene ard ziwan ke qedexekerdişê rojname û kitaban, kêmkerdişê sohbetî, aktîvîteyanê sey sporî zî teynatîye zêdînenê û vat: ''Nê şertan de ganî ma pers bikerê ke 'gelo tepişteyê weşî est ê?' Merdimî teber de bibê zî benê nêweş. Xora tepişteyî zî benê nêweş. La tepişteyî nêeşkenê hertim tedawî bibê.''

Gulserene dîyar kerd ke tecrîd beno sebebê nêweşîyan û vat: ''Ma sey ÎHDyî na babete de tim eleqedar benê. Ma muracatan gênê. Mektubê tepişteyan û keyeyanê tepişteyan tim yenê ma. Ma rewşe teqîb kenê û xîret kenê ke têbigerê. La ganî tepişteyan û keyeyanê înan rê komel bi xurtî paştî bido û vengê zîndanan bido eşnawitene.''