Vervatoxa HDPyî Ebru Gunay merkezê pêroyî yê partîya xo de kombîyayîşê çapemenîye de rojdem ercna.

Qiseykerdişê Gunaye ra beşêk wina yo:

Gunaye vera tepişîyayîşê rojnamegeranê kurdan nêrazîbîyayîşê xo mojna û vat: ''8ê hezîrane de 20 rojnamegerî zî tede 22 kesî ameybî destbendkerdene. Nînan ra 16 rojnamegerî ameyî tepiştene. Sey vizêrî ewro zî çapemenîya kurdan do bêveng nêba. Şima do nêeşkê ney bikerê. Hukmat seba ke raştîyan ra terseno nê rojnamegerî tepiştî. Ma reyna vanê ke ma hertim hetê çapemenîya azade de yê.

Tirkîya mîyanê krîzê ekonomîkî yê pîlî de ya. Îqtîdar pêro çimeyanê şarî dano şerî. No îqtîdar vera her çi hêriş keno, welatê xo rê pêro xirabîyan keno, rayîranê dîyalogan qefilneno. Tirkîya de bingeyê pêro meseleyan de tecrîdê Îmraliyî est o. Polîtîkayê tecrîdî neçareserkerdişî de israr ê. Coka ganî tecrîdê vera Îmraliyî biqedo. Seke zanîyeno ma waşt ke ver bi Gemlîkî şorê. La hişmendîya AKP-MHPyî destûr nêda ke şar şoro. Tirkîya de her roje bêedaletî vila bena. Sîstemê tecrîdî vilayê pêro welatî bîyo. Seba ke meseleyî çareser bibê ma waşt ver bi Gemlîkî şorê. La îqtîdarî reyna verê haştîye girewt û ma asteng kerdî.

Hêrişê ke Îstanbul de ameyî kerdene netîceyê tecrîdî bîyî. Vera wekîlan hêriş û astengîyî ameyî kerdene. Wekîlê ma ameyî derbkerdene. Hemwelatîyî ameyî destbendkerdene û înan îşkence dî. 2 embazê ma ameyî tepiştene. Rayraşîyayîşê ma yê demokratîkî de astengîyê tewr pîlî vejîyayî ma vernî. Ma tecrîd Îstanbul de dî. 

Nê hêrişê barbarî talîmatê kamî yê, ma hol zanenê. Wa ê zî hol bizanê ke hînî yew meşrûtîya nê îqtîdarî nêmenda. Vera qedexe, astengî û bêhuqûqîyanê înan tewirê ma xoverdayîş û têkoşîn bi. Ma reyna apey gamêke nêeşte. Tecrîd sûcê merdimîye yo û ma do tim nê sûcî îfşa bikerê.''