Vervatoxa HDPyî Ebru Gunay Merkezê Pêroyî yê HDPyî de derheqê rewşa peyên a partîye de kombîyayîşê çapemenîye kerd. 

Gunaye semedê paştdayîşê weçînitişî spas kerd û ard ziwan ke înan badê weçînitişî demê newekerdişî dayo destpêkerdene.

Ebru Gunay nê vatî: "Ma dewrêk xo dima verda.  Ma prosesê erjnayîşê badê weçînitişî da destpêkerdene. Verî ma sey hemserek û vervatoxanê HDK, KCD, HDP, Partîya Çep a Keske û DBPyî kombîyayîşêk kerd. Dima HDPyî bi hemvervatox û hemsarekanê xo kombîyayîş kerd. Grûba Meclîs û MYK zî do komb bibo. Dima ra  4-5-6ê hezîrane de meclîsê cinîyan û partîye û hemserekê bajaran do kombîyayîş bikerê û planê ke hewce ke vejê werte.

Hedefê ma yo bingêyin bi şuxulnayîşê mekanîzmaya rexnekerdiş-xorexnekerdişî semedê demê neweyî xo hazirkerdiş o. Ma do şarê xo reyde zî bêro têhet û kombîyayîşan bikerê. Ma do kombîyayîşan de kêmîyanê xo yê weçînitişî ser o vinderê û nînan ra dersan vejê. Waştişê ma xo newekerdiş o. Ma do muhasebeyê xo bikerê û goreyê ci çîyo ke hewce keno, bîyarê ca. Ma do dewrê konferans- konreyê girdî yo ke rîyê weçînitişî ra peyde amebi eştene, bidê destpêkerdene. HDP partîya şarî ya. Heta ewro bi şarî estbi ewro ra tepîya zî do bi şarî bibo."

Gunaye badê eşkerayîye persê rojnamegeran cewab kerdî. Gunaye wina cewab da persanê derheqê namzedîya Demîrtaşî: "Ma verê weçînitişî embazanê xo yê ke tepişteyê, înan reyde zî muneqeşeyî kerdî. Namzedîya Demîrtaşî rîyê rewşa ci ya huqûqî ra nêameye erjnayene. Xora ey vatêne wa cinîyêke bibo namzeda serekkomarîye. Rexnekerdiş  û xorexnekerdişê ey semedê ma biqiymet o. Ma do sey partî pîya bi  şarê xo semedê prosesê kongre û konferansî qerar bîgêrê."