Karê ronayîşê babetanê tîman, awankerdişê budçe, amadekerdişê bernameyê dersan û xurtkerdişê binawanîya perwerdeyî yenê kerdene. Yeno waştene ke zanîngeh 2026 de dest pê perwerdeyî bikero.

Serekê Deutsch-Kurdisches-Forum e.V. Dr. Yûnis Behramî pare kerd ke fikrê ronîyayîşê nê zanîngehî bi îlhamê Şorişê Rojawanî vejîyayo werte. Behramî ard iwan ke înan hêverî waşto ke ‘Enstîtuyê Kurdolojî’ awan bikerê la proje vurîyayo awankerdişê zanîngehî.

Behramî vat: ‘’Goreyê bernameyê heyetê ronayoxî zanîngeh do heta peynîya serra 2026î amadekarîyan biqedîno û wendekaranê xo yê verênan qebul bikero. Ziwanê perwerdeyî bi giranî do kurdkî bibo la dersê bi almankî û îngilîzkî zî bêrê dayene. Zanîngeh de beşê Kurdolojî, resim, zanistê komelkî û muhendîsîye do ronîyê.

Wendekarê ke lîseyanê Rojawan û Başûrî ra mezun benê, seba nînan zanîngeh do bibo firsend. Statuyê Zanîngehê Kurdan do asta mîyanneteweyîye de bibo. No zanîngeh tena dezgehêkê perwerdeyî nêbo; seba ziwan û nasnameyê kurdan Ewropa de do bibo gamêka destpêke. Mabênê komelê almanan û kurdan de do hemkarîya akademîke û kulturele bêra xurtkerdene; kurdkî do warê umûmîye de bêra şuxilnayene.’’