Vervatoxa HDPyî Ebru Gunay Merkezê Pêroyî yê HDPyî de kombîyayîşê çapemenîye de qisey kerd û rojdem ercna.

Qiseykerdişê Gunaye bi kilmî wina yo:

''Qirkerdişê Roboskî 11 serrî xo pey de verdayî la hema zî kiştoxî nêameyî muhakemekerdene.  Eke hesabê nê qirkerdişî bêro dayene o çax demokrasî do bêra nê welatî.  

Wekîlê ma 7 rojî yo vera tecrîdî nobeta edaletî kenê. Tecrîdî ra nê welatî de polîtîkayê şerî zêdîyenê. AKP îqtîdarêko winayên o ke tecrîd xo rê kerdo metodêkê îdareyî.  Seba ke ma vera rejîmê yewmerdimî vinderê ganî vera tecrîdê Îmraliyî têkoşîn bikerê. Wezîrîya Edaletî hema zî derheqê babete de eşkerayîyêke nêdaye. Ma seba pêvînayîşê bi Îmraliyî muracat kerdbi. Wezîrîye cewab nêdayo ney zî. Kursîya ke şima sere de ronişenê seba caardişê edaletî yê. Êyê ke tecrîd de israr kenê benê hemkarê sûcî. Wa Wezîrê Edaletî hemkarê nê sûcî nêbo, cewab bido waştişanê ma û rayîr bido pêvînayîşê keye û avûkatan. Eke tecrîd bêro wedaritene haştî, demokrasî û azadîye do bêrê. AKP seba ke îqtîdarê xo mende bikero hende tecrîd de israr keno.

Tecrîdî reyde Hemsereko Pêroyî zî tede xeylêk hemserek û îdarekarê DBPyî tepişîyayî. No îqtîdar do bin bikewo. Ê wazenê bi nê tepiştişan startê weçînayîşan bidê. La şarê kurdî sindoqan de do cewabê şima bido. Ma veng danê ke wa embazê ma Bayindir cade bêro veradayene.  Ma tim hetê DBPyî de yê.

Serrgêra 10. ya Qirkerdişê Parisî yê 13ê Çeleyê 2013î de reyna Paris de qirkerdişêk ame kerdene û hîrê kesî ameyî qetilkerdene. Îqtîdarê AKP-MHPyî her ca de hêrişê kurdan keno. Ma venga selahîyetdaranê hukmatê Fransa danê ke wa cade nê qirkerdişan roşnî bikerê. Ma dewaya qetilkerdişê Denîze Poyraz de zî dî ke kiştoxî û hêzê peyê înan senî pawîyenê. Heta ke nê hêzê tarîyî hesab bidê têkoşînê ma do dewam bikero. 

Weçînayîşê serra 2023yî weçînayîşanê tewr girîngan ra yew o. Coka ma amadekarîyê xo yê weçînayîşî temam kerdî. Stratejîya ma ya bingeyîye binvistişê nê îqtîdarî, zêdînayîşê temsîlîya şarê xo û awankerdişê ameyoxê demokratîkî yê. 4-5ê sibata 2023yî de ma do Îstanbul de bi beşdarîya rojnameger, nuştox, roşnvîr, sîyasetmedar û akademîsyenan Konferansê Komara Demokratîke bikerê û ma do têkoşînê xo yê vera tecrîdî serra newîye de zî dewam bikerê. Serra 2023yî do biba serra ma ya pîlkerdişê çalakî, nawnayîş, rêxistinkerdiş û têkoşînî.''