Vervatoxa HDPyî û Wekîla HDPyî ya Mêrdînî Ebru Gunay derheqê polîtîkaya tecrîdê vera Ocalanî de qisey kerd. Gunaye vat: ''Tecrîd tim rojdem de yo û ma tim vera tecrîdî bi hawayêkê sîstematîkî têkoşîn kenê. Bi taybetî wextanê kongre û konferansan de vera tecrîdî ma birê xurtî gênê.''

Gunaye ard ziwan ke îqtîdarî tecrîd kerd hacetê îdareyî û vat: ''Faşîzm polîtîkayanê tecrîdî ser o yeno pîlkerdene. Her çalakî û nawnayîşo ke ma vera faşîzmî kenê raşt a raşt vera tecrîdê Îmraliyî yo zî. Her ke tecrîd beno giranêr şer zî beno giranêr. Prosesê haştîye bi taybetî pêvînayîşê 5ê nîsane ra dima îqtîdar pê israrê sîstemê serekîye tecrîd kerd xorîn û konseptê şerî zî dest pêkerd. 5ê hezîrane de teqayîşêk ame meydan, 20ê temmuze de Pirsûs de 33 ciwanî ameyî qetilkerdene, Garê Anqara de kurdî dîyayî bombayan ver.''

Gunaye pare kerd ke nê prosesî de rixmê pêro muracat û  xîretanê avûkat, keyeyan û Heyetê Îmraliyî zî pêvînayîş nêno kerdene. Gunaye vat: ''No zî mojneno ke tecrîd sen girankerde yo. Reyba vejîya werte ke Birêz Ocalan mîmarê haştîye yo.  Tecrîd konseptêk,ê îmha û çinkerdişî yo. Şexsê Birêz Ocalanî de şarê kurdî, hêzê haştîperestî yenê tecrîdkerdene.

Pawitişê ke Birêz Ocalanî Îmrali de nuştî rayaumûmîye reyde ameyî parekerdene. Birêz Ocalanî nê pawitişan de paradîgmaya demokratîk, ekolojîke, azadîya cinîyan û sîstemê konfederalî, sîstemê Neteweyê Demokratîkî pêşkêş keno. Nê pêro seba sîstemê kapîtalîstî tehluke yê.''

Gunaye da zanayene ke qirkerdişê ke Kurdîstan û Tirkîya de yenê kerdene tesadufî nîyê û vat: ''Nê hêrişê vera cinîyan tesadufî nîyê. DAÎŞî zî seserra 21. de bi hawayêkê tesadufî hêrişê cinîyan ê êzidîyan nêkerd û ê nêrotî. Nê pêro pê zanayîşî ameyî kerdene. Nika zî nê hêrişî sey netîceya konseptê şerî û şerê îdeolojîkî xo mojnenê ra û dewam kenê. ''

Gunaye bale ante rayraşîyayîşê vera darbe yê HDPyî ser û vat: ''Rayraşîyayîşê ma de eşkera bi ke meseleya kurdî pê wedaritişê Birêz Ocalanî safî bena. Ma her ca de no çi ard ziwan. Şar zî pê naye hesîya û hînî tecrîdî ra ecîz o. Şarî 'Pêvînayîşê Demokrasîyî' de zî tim no waşt. Seba meseleya çareserîya kurdî Birêz Ocalan aktoro serek o. Ma her ca de ney vanê. Çunke çareserîye Îmrali de ya.''