Vervatoxa HDPyî Ebru Gunay pare kerd ke merganê Garê ra AKP mesuldar o û vat: ''Ma do pîya nê îqtîdarî ra bixelisê. '' Gunaye bale ante grevê vêşanîye yê tepişteyan ser û vat: ''Waştişê tepişteyan bêrê caardene.''
Vervatoxa HDPyî Ebru Gunay merkezê partîya xo de kombîyayîşêkê çapemenîye kerd û rojdem ercna.
Gunaye derheqê hêrişanê vera Garê de vat: ''Ma do operasyon û netîceyanê Garê ser o qisey bikerê.Ma vatbi ke ma mergan nêkenê malzemaya sîyasetî û sûcdarî do hesab bidê. Îqtîdar xîret keno ke cenazayan ra rant bikero. Wezîranê înan Meclîs de zûrî vatî, propaganda kerde. Îqtîdarî herinda ke hesab bido hêrişê partîya ma keno.''
Gunaye grevê vêşanîye yê tepişteyan û binpaykerdişê heqanê tepişteyan vist vîrî û vat:''Tewr peyên Hemşaredara Colemêrgî Dîleke Hatîpoglu rê cigêrayîşo rût ame kerdene. Gardîyanan Dîleke derb kerde. Seba ke Tirkîya qanûnanê xo bîyara ca ganî zîndanan de merdimî bimirê? Verî ke zîndanan ra xeberê xirabî bêrê ganî waştişê meşrû yê tepişteyan bêrê caardene.''
Gunaye peynîya qiseykerdişê xo de Roja Ziwanê Dayîke ya Dinya ser o qisey kerd û vat: ''Vengdayîşê têkoşînî yê vera kerdişanê qedexekeran ê serê ziwanî makî ya. Ma vanê 'Seba heqê ziwanê makî edalet.' Ma bi na wesîle Roja Ziwanê Dayîke ya dinya fîraz kenê û venga her kesî danê ke wa wayîrê ziwanê xo vejîyo û hûrmet bimojno ziwananê bînan.''
