Ame zanayene ke halê weşîye yê nûştoxê kitabê ‘Bogurtlen Zamani’ (Wextê Dirrike) Mûrat Turko ke Zîndan Odemîşî yê Îzmîrî yê Tîpê T’yî de grevê vêşanîye de yo û yê tepişteyan Abdulvahap Şîyar Aydemîr û Vahdettîn Yalçinerî biyo giran.

Pî Ahmet Aydemîrî vat ke înan vizêr lajê xo Abdulvahapî yo ke 1’ê Adare ra nata grevê vêşanîye de yo reyde pêvînayîş kerdo û vat ke zextê serê tepişteyan bîyê vêşî.

‘Her Game Zinca Turkî ra Gonî Yena’

Maye Yildiz Aydemîre zî vat ke lajê aye 13 kîlo dayo û derheqê halê weşîye yê nûştox Mûrat Turk û Vahdettîn Yalçinero ke lajê aye dir no 65 rojî yo grevê vêşanîye de yê hayîdarîyî dayî.

Maye Aydemîre vat zinca Turkî ra her game gonî yena û nê vatî: “Rîyê dejê masulkeyan ra û krampê madeyî ra nêeşkenê rakewê. Mûrat Turk goreyê tepişteyanê bînan hîna zaf bib zihîf. Înan vat ke zinca ê ra tim gonî yena. Her hewte ê hîna zaf verê çimanê ma de benê zihîfî û helênê. Tena seba lajê mi nê, ganî seba heme tepişteyanê ke zîndanan de yê tecrîd bêro wedartene. Gama ke ê nêeşkenê zere de rakewê, ma zî nêeşkenê teber de rakewê. Hewn bîyo heram.”