Halîl Falyali û ramitoxê ci vizêr şan hêrişêkê çekdarî yê vera konvoyê ci de kişîyayî. Sercerg Sedat Pekerî îdîa kerdbi ke Falyali Kibris de merkezê trafîkê pereyî yê narkotîkî de yo.

Medyaya Kibrisî da zanayene ke wesayîto ke tede Falyali estbi, Girne de nêzdîyê keyeyê ci de dîya guleyan ver. Falyaliyo ke bi giranî birîndar nêweşxane de merd. Ame parekerdene ke wextê hêrişî de doman û cinîya Falyaliyî wesayîtêkê bînî de bîyî coka xelisîyayî.

Falyaliyo ke Sedat Pekerî vîdeoyanê xo de ardbi rojdem, aşmêke verî zîndanî ra vejîyabi.

Goreyê agahîyanê ke Pekerî dabî, Falyali, lajê serekwezîrê verênî Bînalî Yildirimî Erkam Yildirim û sercergê dewleta xorine Mehmet Agar pîya merkezê bazirganîya kokaînî de ca gênê. Pekerî ardbi ziwan ke Venezuela ra kokaîn pê gemîyanê Erkam Yildirimî yeno ardene û pêşkêşê bazarê Tirkîya û Rojhelatê Mîyanênî yeno kerdene. Pekerî pare kerdbi ke na bazirganîye de Falyali wayîrê rolêkê pîlî yo.