Garîbe Gezera ke Zîndanê Kandira de maruzê îşkence, teda, tecawuz û kerdişanê xiraban mendbî amebî qetilkerdene.

Birayê Garîbe Haşîm Gezer Zîndanê Xarpêtî rê mektubêke şawite Wekîlê HDPyî yê Kocaelî Omer Faruk Gergerlîogluyî.

Haşîm Gezerî mektube de vat ke ey tim pê telefonî waya xo de qisey kerdêne û Garîbe ci rê qala îşkence û tecawuzî kerdbî.

Mektuba Haşîm Gezerî wina ya:

''Ez Haşîm Gezer, Zîndanê Xarpêtî de manena. Ez birayê Garîbe Gezer a. Mengêke de rayêk, di reyî mi bi telefonî Garîbe de qisey kerdêne. 14.11.2021 de îdareyê Zîndanê Kandira waşt ke pê rayîrê SEGBÎSî mi de qisey bikero. Bê avûkata Garîbe mi nêwaşt qisey bikera. Çunke Garîbe telefon de vatbi ke a hucreyê yewkesî de manena, a ameya berdene bi hucreyê sungerinî, erdî ra kaş bîya, odaya sungerine de kincê ci ameyî dirnayene, gardîyanan ci rê tacîz û tecawuz kerd. Nê pêro qeydanê telefonî de estê, telefon sîstemê qeydê merkezî de qeydkerde yo.

Seke ez zanena hîrê avûkatê Garîbe estbîyî. Nînan ra yewe Jîyane, Erene Keskîn ê û aya bîne nêşinasnena. Eke mi adresê înan bizanayêne mi înan rê nuştêne. Eke şima eşkenê xo biresnê nê avûkatan na babeta telefonî bîyarê ziwan. Eke ê xo biresnê mi hîna hol beno yan zî eke dozger îfade biwazo ez îfade dana. Seba ke proses bêkêmî dewam bikero wa avûkatê Garîbe xo biresnê mi.''

Gergerlîogluyî seba ke Wezîrê Edaletî cewab bido derheqê beyananê Gezerî de persnameyêk amade kerd û muracatê Komîsyonê Cigêrayîşî yê Heqanê Merdiman ê Meclîsî kerd.