Îstanbul de vera xespkerdişê Şaredarîya Colemêrgî Hêzanê Kede, Haştîye û Demokrasîyî Meydanê Şîşhaneyî yê Beyoglu de eşkerayîye daye. Hemvervatoxê HDKyî Esengul Demir û Cengîz Çîçek û Hemsereka Pêroyî ya DEM Partî Tulaye Hatimogullari tewrê eşkerayîye bîyî. Reyna xeylêk partîyanê sîyasîyan, sendîka, komel, dezgeh û sazgehan paştî daye eşkerayîye.

Tulaye Hatimogullari ard ziwan ke welat de yewna darbe bîyo û nê vatî: ''AKP sey cemedî helîyeno. Ganî ma pîya bi heme dezgehanê şorişgêr û demokratîkan vera faşîzmî têkoşîn bikerê. Semedê xespkerdişê îradeyê kurdan qeyûman ca kenê. Bi qeyûman kurdan rê vanê ke heqê şima yê weçînayîşî çîn o, eslê xo de şarê kurdî hemwelatîye ra vejenê. Ma sey heme şaran  û hezanê demokratîkan vera qeyûmî yê. Ferqê na darbe û cuntaya leşkerî ya 12ê Êlule çîn o. Ma do vera nê pêro pîya bi paştdayîşî ser bikewê, ma do vera faşîzmî têkoşîn bikerê û ser bikewê.”

Serekê Pêroyî yê EMEPî Seyît Aslan zî ard ziwan ke AKP nêeşkeno bi qeyûman vera îradeyê şarî vindero û vat: ''No qeyûm yeno manaya xespkerdişê heqanê demokratîkan ê heme şaranê Tirkîya. Na têna meseleya Colemêrgî nîya. Ewro destê rejîmî de teberê zextî de çîyêko bîn nêmendo. Nê rojan qalê operasyonê teberê sînorî kenê. Wazenê darbe bidê îradeyê weçînayîşê Rojawanî ro. Operasyonanê teberê welatî caverdê. Eke şima nê bikerî ma do sey kedkar û karkeranê Tirkîya  vera şima vejîyê. Hemşaredarê Colemêrgî  bi rayanê bi hezaran kesan ame vîjnayene. Ganî nê kerdişî ra cade peyser bêro agêrayene.''

Serekê CHPyî yê Îstanbulî Ozgur Çelîk zî vera qeyûman nêrazîbîyayîşê xo ard ziwan û vat: ''Ma cakerdişê qeyûmî red kenê. Qeyûm çînhesibnayîşê îradeyê şarî yo.  Ma do tim vera qeyûman bi hewayêkê hemparî têkoşîn bikerê.

Dima ra temsîlkaranê dezgeh û partîyan şar selam kerd û paştî daye DEM Partî. Badê eşkerayîye şarî waşt ver bi Kuçeyê Îstîklalî rayra şiro. Polîsan şar girewt binê ablûqa, bi şîdetî xeylêk kesî destbend kerdî.