Hetkara Hemseranê HDPyî ya Komîsyona Şaran û Bawerîyan ra Berpirsîyare Tuılat Hatîmogullari ANFyî redye qisey kerd û îfade kerd ke îqtîdar qerardar o ke rejîmê xo yo newe mende bikero. Hatimogullariye vat: ''Vera HDPyî tedayêka pîle esta. Hetêkî ra qeyûm tayînê şaredarîyanê HDPyî kenê hetêkê bînî ra zî seba ke şaredarîyanê HDPyî bêtesîr bikerê destê înan ra çi yeno kenê. Tîya de armanco bingeyî no yo ke îdareyê herêmî tepkperest û merkezperest bêrê kerdene.

Kurdîstan û Tirkîya de hêrişêîbadetxaneyan, goristanan yenê kerdene. Xîret kenê ke tarîx, este û erjanê manewîyan ê şarê kurdî werte ra wedarê. Nê hêrişê hêrsê şarê kurdî yê vera îqtîdarî û otorîte zêdêr kenê.

260 cenazayê Xarzanî kutuyanê plastîkan de ameyî definkerdene. No zulmêko giran o. Hûrmetê seba mergan manewîyatê ma xurt kenê. No kerdiş seba şarê kurdî û şaranê pêroyînan mesajêk o ke vanê 'Wa çîyêkê şima çinbo.' ''

Hatîmogullariye bale ante kişîyayîşê Bariş Çakanî ser û vat: ''Faşîzm seba ke estbîyayîşê xo mende bikero her çi seferber kerd. Ma dî ke wextê pandemîye de zî polîsan senî şîdetê merdiman kerd.

Vera sîyasetê cîyakerî hînî sebir nêmend, seba ke verê mendebîyayîşê nê rejîmî bêro girewtene ma wextêkê girîngî de yê. Nê welatî de vêşanîye zêdîyena, sîyasetê cîyakerî yê vera cinîyan zêdîyeno. Ganî her kes vera ney bi hawayêkê hemparî têkoşîn bikero. Ez wazena muxalîfan, rêxistinanê heqanê merdiman û dezgehanê komelkîyan rê vaja ke 'beno ke siba do erey bibo.' Ma wextêkê winasêne de ke Tirkîya alarm dana. Heqê merdiman û demokrasî nê welatî de yenê qetilkerdene. Seba ke ma bieşkê nînan newe ra awan bikerê ganî ma têkoşînê xo berz bikerê.''