Çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' 'Rojê Dîyaloganê bi Abdullah Ocalanî' mabênê 15-22yê hezîrane de do xeylêk welatan de bêrê serûberkerdene. 

Vervatoxanê hemle ra sîyasetmedar Hatîp Dîcleyî derheqê armancanê çalakîyanê Rojanê Dîyalogan de qisey kerd.

Hatîp Dîcleyî bale ante ser ke tecrîdê Îmraliyî şexsê Rayberê Şarê Kurdî Abdullah Ocalanî de vera pêro sîyasetmedaranê kurdan û şarê kurdî yeno caardene. Dîcleyî vat: ''Tecrîd seba ke rolê serkêşîye yê Ocalanî bêtesîr bikero yeno caardene. Çunke Abdullah Ocalanî bi paradîgmaya xo vera modernîteya kapîtalîste alternatîfêk naro. Abdullah Ocalan bi pawitişnameyanê xo yê Îmraliyî sîstemê kapîtalîstî teşhîr kenoı û çareserîya alternatîfe pêşkêşê komelan keno.

Sîstemê esîrkerdiş û tecrîdî yê Îmraliyî keno ke komel fikranê Abdullah Ocalanî ra dûrî bikewo. Vera ney Rojê Dîyaloganê Bi Abdullah Ocalanî do bêrê kerdene. Nê aktîvîteyî armanc kenê ke fikranê Abdullah Ocalanî vila bikerê. Na çarçewe de ma do standan awan bikerê, kitabanê Ocalanî biwanê, çalakîyanê hunerî bikerê. Goreyê planan aktîvîteyî qasê 50 welatan de do bêrê kerdene.''

Dîcleyî ard ziwan ke Têgêrayîşê Azadîye yê Kurdîstanî û mîmarê nê şorişî Abdullah Ocalan o û vat: ''Rojawan de şoriş bingeyê Konfederalîzmê Demokratîkî de ronîya. Wextêk ameyêne vatene ke 'Ewropa ra versîya komunîzmî gêrena.' La ewro ma eşkenê vajê ke 'Dinya ra versîya Apogîre gêrena.' Tesîrê na versîye zaf pîl o.''

Dîcleyî peynîya qiseykerdişê xo de pare kerd ke ganî her kes mîyanê xebat û çalakîyanê vera tecrîdî de cabigêro û vat: ''Seba ke CPT û Konseya Ewropa vera tecrîdî erkanê xo bîyarê ca ganî ma têbigêrê. Mîsal ganî her ca de dezgehê çapemenîye, partî, rêxistinê komelê sivîlî û têgêrayîşê komelkîyî bêrê zîyaretkerdene û hemle bêra rojdemkerdene. Ganî pêro kurdî sey dîplomatan bixebitê.''