Sereka Rûmete ya Federasyonê Komeleyanê Huqûq û Paştdayîşî yê Keyeyanê Tepişteyan û Hukmwerdeyan ê Medî (MED TUHAD-FED) Havva Ozcan derheqê tepişteyanê nêweşan û şehîdbîyayîşanê peyênan de qisey kerd.

Havva Ozcan eşkera kerd ke tepişteyê nêweşî nênê dermankerdene û vat: ''Tepişteyê nêweşî raşta zî birînê akerdeyî yê Tirkîya yê. Edirne de Vefa Kartalî, verê cû Sebrî Kaya, Amed Mehmet Emîn Ozkan, Zîndanê Blouyî de Hasan Alkiş, Engîn Aktaş, Avnî Uçar dinyaya xo bedilnaye. Mabênê serranê 2011-2013î de zî tepişteyê nêweşî ameyî veradayene. La pêro dima merdî. Nika rixmê xeylêk xîretan zî tepişteyê nêweşî nênê veradayene. Îqtîdar na babete de zaf kîndar o.  Tewirê îqtîdarî yê vera tepişteyan ê nêweşan tewirêko dişmenî û qesaswarî yo.

Prosesê janî de zî koxuşan de 30-40 kesî manenê, maske û lapikî nêdîyenê tepişteyan. Xebatê ma yê seba tepişteyan ê nêweşan wextê janî de bênetîce mendî la têkoşînê ma do dewam bikero. Ma zaf xebatî kerdî. Ma partîyanê sey AKP, MHP û HDPyî reyde kombîyayîş kerd. 

Nêzdîbîyayîşê hukmatî yê vera tepişteyan kîndar û binefret o. Zere û teber de hukmat tim vera kurdan çîyêk keno. La ma qet ê xo ra fek vera nêda. Têkoşînê ma her ke şi bi pîlêr û hêzêr.''