Kongreya Demokratîke ya Şaran (HDK) Beyogluyê Îstanbulî de bi eşkerayîyêke daye pêshnayene ke înan kampanyaya 'Semedê haştîye mîlyonêk îmzayî' daye destpêkerdene û deklarasyonê xo eşkera kerd. Xeylê temsîlkarê partîyanê sîyasîyan, sendîka, dezgeh û sazehan tewrê kombîyayîşî bîyî.

Hemserekê Pêroyî yê DEM Partî Tuncer Bakirhanî bale ante polîtîkaya şerî ya dewlete ser û nê vatî: ''Ma sey DEM Partî paştî danê kampanyaya HDKyî. Rewşa welatî her wextî ra xirabêr a. Welatê ke haştîya xo ya komelkî anî ca  tewr tay binê tesîrê nê krîzî de manenê.  Eke prosesê 2023yî mexeripîyayêne rewşe wina xirabe nêbîne.La îqtîdarî polîtîkaya otorîtere vîjnaye. Tirkîya de şar feqîrîye anceno, dewlete pere dana çeteyanê SMOyî. Eke ma qala haştîye kenê ganî bizanê çimeyî sere şinê. Şer rijnayîş û dej o. Ganî çew tira vejîyo. Rayîrê şerî ra vejîyayîşî çareserîya meseleya kurdan a.  Yewna rayîrê nê çîn o. Refaho ke Erdogan qala ci keno wina beno. Baroyê Îstanbulî, Şaredarîya Beşiktaşî, Şaredarîya Akdenizî şima vînenî, ganî ma na tarîtîye ra vejîyê. Îqtîdar haştîye nêano. Ma anê. Ma do bi na kampanya biresê rojanê dahîna roşnan. Ma veng danê ke wa heme komayê bawerî, bindestî paştî bidê na kampanya.''

Reyna qiseykerdoxanê bînan zî vera polîtîkayanê şerî bale ante muhîmîya têkoşînê heparî û xebatanê haştîye ser.