Kongreya Demokratîke ya Şaran (HDK) semedê tewrbîyayîşê Newroze veng da ke do 30ê înan bajarî 61 merkezan de bêro fîrazkerdene. 

Kombîyayîşo ke Otêla Hîllî yê Taksîmê Îstanbulî de ame kerdene de Hemvervatoxê HDKyî Îdîle Ugurlu û Sedat Şeoglu û temsîlkarê partî û rêxistinanê ke pabesteyê kongre yê tewrê ci bîyî.

Eşkerayîya çapemenîye hetê Îdîle Ugurlu ra ameye wendenê. Ugulu bale ante ruhê xoverdayîşî yê Newroze ser û vat: ''Newroze vera Dehaqan serewedartişê şaran o. Newroze ayebîyayîşê xoza, ganîbîyayîş, xo newe ra  afernayîş o. Coka şarî bicoş Newroze pawenê û bi kêf, şayî nê roşanî fîraz kenê. Peynîya zimistanî wisar o. Peynîya tarîtîye roşnayîye ya. Peynîya îqtîdarê zalimî rijnayîş û peynîya zulmî azadîye ya. Roşano qedîm yê şaranê bindestan ê Rojhelatê Mîyanênî û bitaybetî zî yê şarê kurdî  Newroze  emser do bicoşê pîlî bêro fîrazkerdene.  Hezê demokrasî, edalet û seypêyîye  do dormeyê adirî de vera zordarîya faşîste bibê yew tecrîdo ke komelî ra vila bîyo bişiknê. Peynîya zordaranê faşîstan nêzdîya. Mijdan û vengdayîşê Newroza 2021î nê yê.  Ma veng danê heme hetanê ke cigêrayîşê heq edaletî de yê wa tewrê Newroze bîbi. Newroze fîraz bo.''