HDP: 27 serran de hîşmendîya darbekere nêvurîyaye, kurdî xurtêr bîyî

HDPyî ke derheqê Darbeya 2ê Adare de eşkerayîye daye vat: ''Îqtîdarê AKP-MHPyî hîşmendîya darbekere ya verê 27 serran temsîl keno, kurdî zî bi serran o xurtêr bîyî.''

Heyetê Rayberdişî yê Merkezî yê HDPyî derheqê Darbeya 2ê Adara 1994î de eşkerayîye daye.

Eşkerayîye bi kilmî wina ya:

''Orhan Doganî 27 serrî verî 2ê adara 1994î de Meclîs de vat: 'Hêzanê ke Tirkîya de haştîye nêwaştêne bi rojan pê kampanyayanê şerê psîkolojîkî televîzyonan de ma teşhîr kerdî. Pê sey sûcdarana ameyî mojnayene, ameyî lînçkerdene. Serê ma de bombayî teqayî, embazê ma kişîyayî.'

Nê qiseykerdişî ra dima sîyasetmedarê kurdî Ahmet Turk, Leyla Zana, Orhan Dogan, Hatîp Dîcle, Sirri Sakik û Mahmut Alinak ameyî tepiştene.

Nê hêrişê bi nameyê 'Darbeya 2ê Adare' 27 serrî peyê xo de verdayî. No qiseykerdişo 27 serre ewro hema zî aktuel o. 27 serran de ewnîyayîşê îqtîdaran ê vera kurdan nêvurîya. 5 serranê peyênan de çîyê ke ameyî sereyê kurdan pêro serebûtan eşkera kenê. Tepişîyayîşê wekîl, hemserek, hemşaredaran, muhakemeyê bêhuqûqî, tayînê qeyûman nê pêro mîsalê darbe yê. No îqtîdar pê amadekerdişê fezlekeyan wazeno na rade gamêka bîne aver şora. La netîce werte de ya ma payan ser o yê. Têkoşînê ma geş beno û ma ver bi ameyoxî şinê. Zulm û zorbazîya hîşmendîya darbe nêvurîyaye la kurdî bîyî xurtêr û hîna demokrat.

Ma sere de Darbeya 2ê Adare zî pêro darbeyanê sivîl û leşkerîyan rê nalet kenê. Ma soz danê ka ma do peyê haştî, demokrasî û heqanê xo de bibê û destkewteyanê xo ra fek vera nêdê.''