Hemserekanê Pêroyîyan ê HDPyî Pervîne Buldan û Mîthat Sancarî şerê Îsraîl û Fîlîstînî ser o eşkerayîyêke daye.

Eşkerayîye bi kilmî wina ya: ''Goreyê bîlançoya peyêne ya Wezaretê Weşîye yê Filîstînî 10ê ci domanî 28 filîstînijî ameyî qetilkerdene, 128 kesî birîndar bîyî. Ma nê hêrişan reyna şermezar kenê û serweşîye wazenê. Ma birîndaran rê zî şîfaya xeyrîne wazenê.

Hêrişê terefan ê herêmanê sivîlan mojnenê ke alozîya herême vurîyaye şerî. Ma venga terefan danê ke hêrişê vera sivîlan wa vindarnê. Meseleya mabênê Îsraîl û Fîlîstînî pê dîplomasî, dîyalog û muzakeran çareser bena. Ma venga Neteweyanê Yewbîyayeyan, rayaumûmîya mîyanneteweyîye û dezgehan danê ke seba vindertişê şerî cade têbigêrê.''