28ê sibata 2015î de mabênê heyetê Îmraliyî û selahîyetdaranê hukmatê Tirkîya de Mutabeqatê Dolmabahçe amebi îmzakerdene. Heyetê Rayberdişê Merkezî yê HDPyî mutabeqat vist vîrî û îfade kerd ke o çax komel de hêvî, haştî û wayûbiratîye virazîyabi.

HDPyî ard ziwan ke no mutabeqat mabênê pêro terefanê kurdan û dewlete de amebi kerdene û Abdullah Ocalanî o çax waşt meseleya kurdan bi haştîye çareser bikerê la AKP kewt hesabanê qijan pey.Çinhesibnayîşê nê mutabeqatî da binkerdene.

HDPyî vat: ''Serebûtê nê 6 serran ma rê ferz kenê ke ma muhakemeyê nê serran bikerê. Çinhesibnayîşê mutabeqatî têna  îradeyê çareserîye çin kerd û welat a roje ra nata binê tarîtîye de ya.OHAL, KHK, rejîmê qeyûmî û darbeya sivîle nê prosesî de bîyî mende û azadîya fikran, heqê sîyasetî ameyî binpaykerdene. Tirkîya mecbûra nê prosesê tarîyî nîya. Tek rayîrê xelasî agêrayîşê mutabeqatî yo.

Ma hema zî pabesteyê îradeyê çareserîye yê Mutabeqatê Dolmabahçe yê. Heta ke ma Tirkîya de çareserîya demokratîke bîyarê ca ma do têkoşînê xo dewam bikerê. Wayîrvejîyayîşê nê îradeyî hewceyêko demokratîk o. Ma reyna veng danê ke wayîrê nê îradeyî vejîyê û seba çareserîye kede bidê''