Wekîlanê Partîya Demokratîke ya Şaran (HDP) bi wesîleya serrgêra ci ya 42. derheqê Qirkerdişê Mereşî de Meclîs de kombîyayîşê çapemenîye kerde.

Eşkerayîye de wekîlan kesê ke ameyî qetilkerdene fotografê înan kiriştî. Wekîla HDPyî ya Adana Tulaye Hatimogullari ard ziwan ke çîyo ke Mereş de bi qetilkerdişî ra wetêr qirkedişêk o.

Hatimogullari vist vîrî ke keyeyê elewîyan verî ra ameyî bewlîkerdene û hedefgirewtene vat: ''Qirkerdişê Mereşî tarîxanê 19-25ê kanûna 1978 ame meydan û bitaybetî vera elewîyan çepgiran ame kerdene. Qirkerdişo ke her merhelaya ci plankerde ameye kerdene goreyê hûmaranê fermîyan yê hadîseyanê 7 rojan 111 kesî ameyî kiştene. La goreyê şahîden bi seyan kesî ameyî kiştene. Reyna goreyê hûmaranê fermîyan 200 ra zafêr keyeyê elewîyan ameyî vêşnayene û 100 ra zafêr cayê karî ameyî texrîbkerdene. La raştîya de hûmara înan dilab-hîrlab  a.

Çimê pîrike Cennet Çîmen a kore ameyî vetene, zereyê Esma Sunaya digane ame qelişnayene û derguşa/ê ci tira ame/ye vetene, wasilê domano 12 Alî Traşî ameyî letekerdene. No yew qetilkerdiş nê, eslê xo de semedê çînkerdişê elewîyan qirkerdişêk bi. Dejo pîl zî oyo ke elewîyî hetê cîrananê xo ra ameyî qetilkerdene. Heta ke nê welatî de tarîxî reyde nêro têrî demokratîkbîyayîş nêbeno. Semedê averşîyayîşî demokrasîyî ganî heqê hemwelatîya seyyewbîne yo ke sey şitê dayîke helal o bêro naskerdene.''