Vervatoxa Heyetê Cinîyan ê Îdareyanê Cayîyan ê Demokratîkan ê HDPyî Halîye Turkoglu bi eşkerayîyêka nuştekîye vera hêrişê hukmatî yê vera cinîyan nêrazîbîyayîş mojna.

Eşkerayîye wina ya:

''Cinîyê ke têkoşînê azadîye û seycîyeyî rayra benê rixmê heme hêrişanê îqtîdarî 8ê Adare bi coşî pîroz kerd. Şîdetê camêrd-dewlete ke deskewteyê cinîyan bi destê qeyûman xesp kerdî narey zî têkoşînê 8ê Adare hedef girewt û Amed de dest pê operasyonanê destbendkerdişî kerd. Şîdetê hukmî yo ke vera têkoşînê cinîyan ê kurdan yeno kerdene nîno qebulkerdene. Ma senî ke vera qeyûman peyser game nêeşte ma do vera şîdetê hukmî yê îqtîdarî de zî milê xo çewt mekerê.

16ê adare de hemşaredar û hemserekê ma zî tede 24 cinîyî ameyî destbendkerdene. Hemsereka ma Gulşene Ozer, Hemşaredara Sûrî Filiz Buluttekin, endamê ma yê meclîsê şaredarî Jale Okkan, Emine Kaya, Esma Efeturk,Bahare Karakaş Ulug û Songul Kapanci zî tede 11 cinîyî ameyî tepiştene.

Nê heme destbendkerdiş û tepiştişî ramojnenê ke îqtîdar senî têkoşînê cinîyan ra terseno. Ma do vera îqtîdarê  dişmenê cinîyan têkoşînê xo pîlêr bikerê. Çew nêeşkeno bi hêrişan verê têkoşînê ma bîgêro. Têkoşînê ma do rixmê heme şîdet, zext û hêrişanê îqtîdarî qerardar dewam bikero.''