Serekwekîlê Grûba Partîya Demokeratîke ya Şaran (HDP) Saruhan Oluçî kombîyayîşê çapemenîye de rojdem ercna.

Oluçî vist vîrî ke îqtîdar hukmî ser o zext keno û talîmat dano ke wa partîya înan bêro qefilnayene û vat: ''Heta ewro qefilnayîşê partîyan biyo çare? Xeylêk parîyê ke ma eynî xete de falîyetî rayraberdene ameyî qefilnayene. Tewr peynî de 2019 de wextê îqtîdarê AKPyî de DTP ame qefilnayene. Netîceya qefilnayîşê 5 partîyan de problemî çereser bîyî? Meseleya kurdî çareser bîye? Rişyayîşê gonî vinderte? Haştîya komelkîye ameye? Nê. Nînan ra qet çîyêk nêbi. Her tim êyê ke xover danê semedê ardişê haştîye mucadeleyê xo pîlêr kerd û meydanê sîyasetî de cayê xo girewt.

AKP înanê ke vizêr waştene ey biqefilnî reyde ame têhet û ewro wazeno HDPyî biqefilno. Munaqeşeyê qefilnayîşê HDPyî îtîrafê nêeşkayayîşê ci yo. Şima wazenê ke wa HDP bêro qefilnayene ke wa kayê şima yê  leyminî mevejîye meydan. Şima se kenê bikerê HDP do sey hêzê bingeyî bimano. Eke HDP bêro qefilnayene do 6 reyî bibê 10 mîlyon. Mehkemeya Heqanê Merdiman a Ewropa derheqê Selahattîn Demîrtaşî de qerarêko tarîxî da ke no heme dewayê ke vera partîya ma ameyî akerdene betal kerdî. Eke qerarê MHME nêro ca û HDP bêro qefilnayene do bedelê ci heme Tirkîya bo.''