Dima ke artêşa Iraqî dewa Gir Zerik û dormeyê ci de hêzê xo yê leşkerî ca kerdî Hemvervatoxanê Komîsyonê Têkilîyanê Teberî yê HDPyî Feleknase Uca û Hîşyar Ozsoyî eşkerayîyêke daye.

Eşkerayîya HDPyî wina ya: 

''Şanê 20ê nîsane ra nata ma xeberanê derheqê Şingal de sewqê leşkerî yê Iraqî teqîb kenê. Dima ke hêzê Hukmatê Iraqî û Hukmatê Herêma Kurdîstanî qirkerdişê DAÎŞî yê vera Şingalî yê 2014î de remayî travmayêke virazîyaye. Hema ke na travma werte de ya mudaxeleyê neweyî do texrîbatanê pîlan bîyarê meydan. Ma derheqê nê texrîbatan de 26ê teşrîna peyêne ya 2020î de Serekkomarê Iraqî Birêz Berhem Salîh û Serekwezîrê Iraqî Birêz Mustafa El-Kazimî rê mektubêke pêşkêş kerdbi.

Sey HDP ma peydakerdişê hêzê xo yê şarê êzidîyan rê destek danê ke no şar mexdûrê 74 fermanan o. Heqê xopawitişo ke serwerîya Iraqî rê gefêk nêwaneno  seba êzidîyanê ke tim qirkerdişî reyde têrî yê, sîgorta ya û ma wazenê ke wa her kes nê heqê meşrûyî rê hûrmet bikero.

Şingalo ke goreyê Qanûnê Bingeyî yê Iraqî hema zî herêma sebebê nîqaşî ya, şarê Şingalî eşkeno derheqê çarenusê ci de bire bido. Eşkera yo ke mudaxeleyê leşkerî yê vera Şingalî aramîya sîyasî û komelkîye ya Iraqî rê bi hawayêkê xirabî tesîr bikerê. Ma venga pêro terefanê mesuldaran ê Iraqî danê ke Şingal de herinda forsê hêzê leşkerî de ganî pê dîyalog û muzakereyan meseleyî bêrê çareserkerdene. Ma venga pêro nê terefan danê ke sere de heqê xopawitişî seba ke pêro heqê demokratîkî yê şarê Şingalî bigêrîyê binê garantî wa pêro terefî mesuldarîye bigêrê xo milî.''