Wekîlê HDPyî yê Êlihî Mehmet Ruştu Tiryakî hêriş û dewaya qefilnayîşî yê vera partîya ci ercnayî.

Tiryakîyî vat: ''Îqtîdar teorî de vera qefilnayîşê partîyanê sîyasîyan o la pratîk de wina nîyo. Îdîanemyo ke ameyo hazirkerdene sey ê verênan o, bîlasebeb û pê çîyanê vengan ameyo pirrkerdene. 600 pelanê îdîaneyî ra 550 pelan de cipêrsayîş û dewayê 687 sîyasetmedaranê HDPyî ke semedê înan qedexeyê sîyasetî yeno waştene, ca genê.

Xora ma tecrubeyanê verênan ra zanê eke partîya ma bêro qefilnayene şar zafêr paşt dano partîya xo pîlêr keno. Partîya ma seba ke semedê her kesî demokrasîyî wazena her hetî ra paştî dîyena ci. HDPyî sey partîya Tirkîya nîya sûcdar kenê la eslê xo de seba ke partîya Tirkîya ya wazenê biqefilnê. Ez nêpawena ke Mehkemeya Qanûnê Bingeyî nê şertan de pê nê îdîayan qerar qefilnayîşî bido. La biqefilnî zî wa her kes bizano ke HDP bê alternatîf nîyo. HDP bîna û tebeleyan ra îbaret nîyo. HDP yew fîkrîyat o, têgêrayîşê şarî yo. Peyê HDPyî de şar esto. Nê şarî bi serran o bedelê pîyî dayî la rixmê nayî wayîrê partîya xo vejîyeno.

Eşkerayo ke no têgêrayîşo sîyasîyo ke bi mîlyonan merdimî paştî danê ca bi dewaya qefilnayîşî verê ci nîno girewtene. Rîyê na dewa ra do paştdayîşê HDPyî zafêr bo. Tirkîya de sey îtîfakê mîletî û îtîfakê cumhurî di blokî estê. Ma roja verêne ra sey Stratejîya Rayîrê Hîrêne teberê wird îtîfakan de yê. Ma zanê ke pê îtîfaqê partîyan yê semedê vîjnayîşî Tirkîya demokratîk nêbena. Ma do semedê ronayîşê sîstemêkê demokratîkî xebatanê xo rê bêmabên dewam bikerê.''