Qezaya Dêrikî ya Mêrdînî de 20ê tebaxe de frenê TIRê Fabrîkaya Etî Bakirî yê Cengîz Holdingî teqa. Netîceya qeza de 20 kesan dinyaya xo bedilnaye.

Badê qeza Vervatoxa HDPyî Ebru Gunay zî tede heyetê HDPyî Dêrik zîyaret kerd. Heyeto ke tewrê definkerdişê hemwelatijan bi û merdimanê înan rê serweşîye waşt dima ra derheqê qeza de cipersayîş kerd û bale ante îxmalen ser.

Heyetê banê HDPyî yê Dêrikî eşkerayîye daye. Eşkerayîye de Gunaye qisey kerd. Gunaye vat:  ''Qezayêko sey qirkerdişî qewimîya ke vizêrna heme dinya qal ci kena. 21 dêrikijan dinyaya xo bedilnaye û 6ê înan bi giranî zaf birîndarî zî est ê.  Ma sey HDPyî badê qeza cade ameyî tîya û heta nîmeyê şewe verê nêweşxaneyî de pawit.  Ma nizdî ra dejê şarê xo rê şahîdîye kerde, ma tîya ra reyna serweşîye wazenê.

Dejê ma pîl o la no nêeşkeno serê raştîyêke bîgêro. Hêverî ra îxmalî est ê. Êyê ke yenê pawitene zaf rehet qeza kenê û hesabê nê nêdanê. Pêro zaf hole zanê ke Tesîsê Etî Bakarî yê Cengîz Holdîngî  bi serran o Mêrdîn de benê sebebê mergan.  Xoza qir kenê, pê TIRan benê sebebê mergan. Vizêr eke bade qezayê verênî rayîr biameyêne qefilnayene qezayo bîn nêbîyenê. Eke tedbîrî biameyêne  girewtene no qirkerdiş nêbîyênî.  Eke TIRî wextê ci de biameyênî kontrolkerdene nê qezayî nêbîyênî. Kiştox Cengîz Holdîng seba ke paştîya xo daya îqtîdarî rehet têgêreno û beno semebê mergan. Cengîz Holdîng berpirsîyarê mergê 21 kesan o. Dehê Dêrikî dejê ma yo. Heta ke kiştoxî hesab bidê ma do şarê xo reyde têkoşîn bikerê.''

Serekwekîla Koma HDPyî Merale Daniş Beştaş zî vat:  ''Ewro Dêrikî sîya giredayo. Esnafan kepenkî qefilnayî. Hewtî ra heta hewtayî şar goristanan de cenazayanê xo defin kenê. Raşta zî dejêko zaf pîl o. Ma rayîrî ra ameyî dîyî ke badê dejî şar senî tengayî anceno. Ma rayîr de çend rey ameyî vindarneyene. Nê germ kilijî de cenaza rayîr de vindarnenê û nasnameyê merdimanê ci kontrol kenê. 

Gama ke ma vanê dewleta polîsan ma nê vanê. Seba ke wezîrê karanê teberî yeno Dêrik îşkenceyê ci şar anceno. Eke yeno tehzîye wa sey hemwelatîyî bêro. Semedê ey cenaza rayîr de yena vindarnayene û merdimna înan rê dej dîyeno antene. Wina yew çî beno? Semedê parekerdişê dejê  şarî yeno la bajar pêro kîlît beno. Hêzê dewlete yê ke ewro tîya de yê şima vizêr ça de bî? Eke vizêr wextê ci dormeyê qeza biameyêne girewtene o TIR nêameyêne şar nêeciqnayêne. Wezîrê Karanê Zereyî Soylu û êyê ke binê fermanê ci de yê semedê asayîşê xo cuye felç kenê la cuya şa rê nê bajarî, welatî û kurdan xeymê înan de nîyo.''

Hemsereka Pêroyî ya DBPyî Salîha Aydenîz zî vat:  ''Êyê ke semedê rantî xozaya Kurdîstanî talan kenê, şarî nêpawenê. Dişmenîya vera kurdan ra xozaya Kurdîstanî talan kenê. Heta ke îxamlê nê qezayan û berpirsîyarî vejîye werte ma do na babete deqîp bikerê.''