Wekîlê HDPyî yê Dêrsimî Alîcan Onlu û Wekîlê HDPyî yê Antalya Kemal Bulbulî badê zîyaretê Dêrsimî Meclîs de kombîyayîşê çapemenîye kerd.

Alîcan Onluyî ard ziwan ke zetxê îqtîdarî ra tewr zaf Dêsim tengayî anceyo û vat: ''Dêrsim de xeylêk wext o kelekol, kuleyê çimdarîye û nûqtayê cigêrayîşî yenê viraştene. Pê nînan bajar açarîyayo garnîzonî. Bajar de her çî pê hetê walîyî ra yeno rayraberdene ke sey kadroyêkê AKPyî têgêrano. Heme sazgehî xizmetê îqtîdarî kenê û vera partîya ma dişmenîye kenê.

Îqtîdar tewr zaf hêrişê cinîyan keno. Dêrsim de zî bado ke qeyûm ame cakerdene verî cayê cinîyan xesp kerdî. Serrêke ra zafêr o Gulîstane Doku nîna vînayene. Qey? Vînî nêbîye, ameye vînîkerdene. Nayî ser o yeno waştene ke mesaj bidîyo cinîyan. Rixmê heme caardişanê antîdemokratîkan cigêrayîş û pêrsayîşêko huqûqî nêameyo destpêkerdene. Caardişê sey qirkerdişê vera cinîyan, tecawuz, îstîsmarê domanan, qedexeyê merayan, herême qedexeyî, qedexeyê çalakî û aktîvîteyan estê û kam/e ke bigero heqê xo yê demokratîkî raştê ceza yeno/a.

90 serrî yo vera nê bawerîye asîmîlasyon esto. Dewanê elewîyan de camî virazenê, domananê ma pê zorî şawenê Îmam Hatîban. Demo peyên de qereqolan de dewanê elewîyan de ezan yeno wendene. No hem elewîyan rê hem zî îslamîyetî rê bêhurmetîye ya. Reyna mesela qoricîkerdişî zî esta. Tewr zaf zî şinê cinîyan ser ke wa bibê qoricî.''

Bulbulî waşt ke wa nameyê Dêrsimî bêro îadekerdene û vat:  ''Dêrsim de pê polîtîkayanê asayîşî rijnayîşo ekolojîk yeno kerdene. Xora awbend û HESî zî netîceya na polîtîka ya. Pê qedexeyan berardişo herêmî yeno çînkerdene. Esnaf nêeşkeno îdareyê xo bikero. Meseleya rayîrî  esta. Reyna şewatê daristanan ê sîstematîkî estê. Xora qirkerdişê vera pezkovîyan zî dewam keno.''

Wekîlan waşt wa nê berê kerdene:

* Polîtîkayê şerî ke Dêrsim de yenê rayraberdene wa cade bêrê vindarnayene.

* Dewlete wa ziwan, bawerî û kulturê şarê Dêrsimî qebul bikero.

* Qedexeyê merayan wa berê qedînayene, caardişê qoricîkerdiş û ajanîye bêrê vindarene û wa giranîye bidîyo polîtîkayanê berardişî .

* Wa paştî bidiyo esnafê cayîyî ke vera şîrkenê pîlan bieşko têbigero.

* Qedexeyê herêna wa bêro wedaritene û paştî bidîyo dewijan.

* Qerarê ke derheqê cayanê bimbarekan de yenê girewtene wa verî rizaya komelê bawerî bêro girewtene.

* Çimeyê ke semedê polîtîkayanê asayîşî yenê şuxulnayene wa semedê şarê Dêrsimî bêrê şuxulnayene.

* Berpirsîyarîya îdareyanê ma yê cayîyan zî esta. Ganî taxrîbatê ke qeyûmî vera ziwan, kultur û bawerîya şarî afernayî werte ra bêrê wedaritene.