Rêxistina HDPyî ya Îstanbulî dêrsimijan reyde ameye yewca û meseleyanê Dêrsimî ser o qisey kerd. Kombîyayîş bînaya Umranîye ya HDPyî de ame kerdene.

Hemvatoxê HDKyî Cengîz Çîçek, Hemsereka Pêroyî ya Komeleyanê Elewîyan ê Demokratîkan (DAD) Kadrîye Dogan, îdarekarê DADî, Endamê Meclîsê Partîye yê HDPyî Murat Aydin û xeylêk dêrsimijî tewrê kombîyayîşî bîyî. Salona kombîyayîşî de fotografê Elîşêr, Zerîfa, Seyîd Riza û Nûrî Dêrsimî ameyî dardekerdene.

Kombîyayîş de ame vatene ke Terteleyê Dêrsimî yê 1938î ewro pê hêrişanê vera xoza, nasname û bawerîya Dêrsimî dewam keno û ame nîqaşkerdene ke ganî vera nê hêrişan têkoşînêko senîn bêro kerdene.

HDPyî Îzmîr, Îstambul, Çukurova û Dêrsim de dêrsimijan reyde kombîyayîşî kerdbî. HDPyî zanayene ke nê kombîyayîşan de meseleyî û çareserîyê înan ameyî nîqaşkerdene û ê do nînan sey netîcenameyêkî rayaumûmîye de pare bikero.

HDP do reyna Îstanbul de serkêşîya Hetkarê Hemserekanê HDPyî Tayyîp Temelî de bînaya xo ya Îstanbulî de dêrsimijan reyde bêro yewca.