Hetkarê Hemserekanê HDPyî yê Komîsyonê Huqûq û Heqanê Merdiman ra Berpirsîyar Umît Dedeyî derheqê operasyonê qirkerdişê sîyasî yê Êlihî de eşkerayîye daye.

Dedeyî vist vîrî ke serê sibayî Êlih de cinîyê aktîvîst û sîyasetmedarî emşaredara Êlihî Songule Korkmaz, Hemşaredara Kaniya Henê Gulîstane Sonuk, Hemşaredara Hezoyî Nazîme Avci, Hemsereka verêna ya HDPyî ya Êlihî Fatma Ablay, Endama Meclîsê Pêroyî yê Bajarî Semra Guneş, Hemserka HDPyî ya Bajarî Gubete Dogan, aktîvîstê TJA Gurbete Bozyigit, Halîde Keser, Gulnur Deli, Zeynepe Oduncu û Ruken Zeryam Işik ameyî destbendkerdene.

Dedeyî ard ziwan ke îqtîdarê AKP-MHPyî pê nê operasyonan wazeno rejîmê xo yê zorbazîye rê ca bido û sîyasetê demokratîkî tasfîye bikero. Dedeyî bale ante ser ke îqtîdarî 2015 ra nata vera HDPyî bi taybetî endaman ê cinîyan ê HDPyî keno ke yew îklîmê tersî awan bikero.

Dedeyî vat: ''Îqtîdar do nêeşko pê nê polîtîkayan emrê xo derg bikero. Rixmê pêro tedayan zî ê do nêeşkê verê têkoşînê ma bigêrê. Ma do reyna hêvîya xo pîl bikerê û serkêşîya cinîyan de cuya newîye awan bikerê.''