Serekwekîlanê Grûba Partîya Demokratîke ya Şaran ( HDP) Merale Daniş Beştaş û Saruhan Oluçî derheqê qerarê Mehkemeya Heqanê Merdiman ê Ewropa (MHME) yê seba Selahattîn Demîrtaşî û fezlekeyan de Meclîs de eşkerayîya çapemenîye daye.

Eşkerayîye de nê ameyî parekerdene:

''Seba ke qerarê MHME yê semedê Demîrtaşî nêame caardene ma reyna bale ancenê nayî ser. Ma zanê ke MHME 5 babetan de vato binpaykerdiş esto. Bêşik o ke nê heme muhîmê. Goreyê nê qeraran Tirkîya de binpayerdişê azadîya îfedeyî esto. Seba ke nê qerarî qefilnayîşê HDPyî û wedartişê destnêpadayîşê wekîlan eleqadar kenê ma wazenê înan ser o vinderê. Fezlekeyê ke derheqê ma de ameyî amedekerdene de qiseykerdişê ma yê Meclîs û kombîyayîşanê çapemenî ra tede ca genê.

MHME 22ê kanûn a 2020 de qerarê Demîrtaşî de eşkera vatbi ke medayê 10. yê pêkerdişî yeno binpaykerdene. Binpaykerdişê nê madeyê fezlekeyanê peyênan û verênan de ca genê. Eceb o ke hem semedê qiseykerdişî ra hem zî semedê hişkerdişî ra fezlekeyî ameyî amadekerdene. Wa şar nayî bizano ke rezîlîya huqûqîye ya pîle esta. No kumpaso sîyasî yo.

MHME vato ke tepiştişê vera HDPyî bi sebebanê sîyasîyan ameyî kerdene û vengdayîşê Kobanê yê HDPyî  yê 6-7ê Teşrîna Verên a 2014 o ke bi twîtî ameyo kerdene sînorê azadîya îfadeyî de yo. Vengdayîşê şîdetî nîyo. Vato çîyê ke bîyî rîyê nê vengdayîşî ra nêbîyî. Rixmê nînan fezlekeyanê neweyan de çîyê wînayên ca genê. MHME vato ke vera HDPyî nîyeto xirab ê îqtîdarî esto. Ma wazenê ke qerarê Demîrtaşî yê MHME wa bêro caardene.

Eke sûc bibiyayêne ê masa de nêniştêne ro û 6-7 serrî nê pawitêne. Nika qala înan nêmend, vaadê înan qedîyayî, komel de nêrazîbîyayîş esto û anketî moralê înan xeripnenê. Coka nêzanê se bikerê hêrişê HDPyî kenê ke payra bimanê. Ma do desturê nayî medê. Fezlekeyê derheqê 9 wekîlan 2012 ra nata ameyî amadekerdene. Çîyê ke fezlekeyan de yê hetê huqûqî ra ercê çîn o. Twîtê ma yê semedê xoverdayîşê Bogazîçî fezlekeyê Kobanê de yê. Twîtê dereheqê waştişê perwerdeyê ziwanê dayîke zî tede yê. Fezlekeyê ke ser o qîyam nayo ro wîna yê, çîyêko cîddî tede çîn o. Nêşarmîyenê înan ra vanê huqûqî. Ma veng danê hukmî wa AKPyî rê bawerîya şima çînêbo,sey ê verêna beno ke şima zî rayîr de bimanê.''