Heyetê Rayberdişê Merkezî yê HDPyî bi wesîleya 21ê Sibate Roja Ziwanê Dayîke ya Dinya eşkerayîye daye û nê pare kerdî:

''Serra 1999î de UNESCOyî seba paştdayîşê pirrengîya kultur û pirziwanîye 21ê Sibate Roja Ziwanê Dayîke ya Dinya qebul kerde û heqê perwerdeyê bi ziwanê dayîke bi peymanêke viste ver. La heyf ke seserra 20. û ronayîşê komara Tirkîya ra nata ziwanê tirkî ra ber pêro ziwanê bînî ameyî qedexekerdene. Tarîxê Tirkîya de û 100 serranê peyênan de nêzdîbîyayîşê dewlete yê vera kurdkî esasê asîmîlasyon û înkarî ser o ronîya. Ziwanê kurdkî bi hawayêkê sîstematîkî pêro waranê cuye de ame dûrvistene û xeniqnayene.

Seba ke nê welatî de kurdkî zî tede pêro ziwanê bînî bibê ziwanê perwerdeyî û xo aver berê ma do têkoşînê xo rê bêmabên dewam bikerê. Bêguman goreyê peymanan erkê Tirkîya yo ke nê heqî qebul bikera. Ganî qanûno bingeyî goreyê na raştîye bêro amadekerdene û heqê ziwanê dayîke bi hawayêkê fermî bişinasîyo û bêro qebulkerdene. No heqo sereke, esas û global o ke nêeşkeno bêro peygoşkerdene.

21ê Sibate Roja Ziwanê Dayîke ya Dinya şaran û ziwanan rê fîraz bo. Na roje de ma veng danê ke têkoşînê ziwanî wa bêro berzkerdene. Ma venga şarê xo, dezgeh û sazgehan danê ke 21ê Sibate bikerê destpêkê berzkerdişê têkoşînê ziwanê dayîke û bihêzkerdişê waştişê perwerdeyê bi ziwanê dayîke.''